2014-08-28
Today from Hiiraan Online:  _
Wararka Maanta- Isniin, Jan 14, 2013
Golaha Guurtidda oo dood adag ka yeeshay Siyaasadda Arrimaha Gudaha iyo Dibadda ee Somaliland, kana hadlay wadahadallada soo socda



Isniin, Jannaayo 14, 2013 (HOL) — Golaha Guurtidda, ayaa dood adag ka yeeshay siyaasadda Arrimaha gudaha iyo arrimaha dibadda oo ay si weyn u dhaliileen, isla markaana soo jeediyey in wax laga qabto khilaafaad jira ee doorashooyinkii abuureen.

Golaha Guurtidda ayaa labaddii maalmood ee u dambeeyey ka doodayey siyaasadaha Arrimaha gudaha iyo Dibadda Somaliland, kuwaas oo ku kala aragti duwanaa qaabka ay u socdaan arrimaha gudaha iyo dibadda ee xukuumaddu u shaqaynayso.

“Waqigan qaylo badan ayaa jirta meelo badan ayey rabash ka taagan yahay, waxa arrimaha gudaha ka jira ta dibadana way saamaynaysaa, caalamku wuxuu ku ficil qaadanayaa siyaasaddaada arrimaha guduhu siday tahay, markaa waa in la hagaajiyaa siyaasaddeena arrimaha gudaha”ayuu ku dooday Xildhibaan Axmed Obsiiye oo ka mid ah xildhibaanadda golaha Guurtidda, waxaanu xukuumada ku canaantay in shaqadii Guurtidda ay iyagu qabanayaan, isla markaana ay ahayd in xaga amniga guurtiida loo daayo.

Sidoo kale, xildhibaan Obsiiye isaga siyaasada Arrimaha dibadda ka hadlaya waxa uu yidhi “markii hore rajo weyn baynu lahayn dastuurkaynu ku shaqayn jirnay oo ina qaban jiray, qodobkii lama taabtaanka ahaa ayeynu shaki weyn galinay qodobkaasi gorgortan buu ku jiraa inuu gorgortan galena muu ahayn, dee maxaynu Soomaaliya ku wada hadli, ma sidi lixdankii baynu mar labaad nidhaahnaa soomaaliya ayaanu ka mid nahay, waxa rajadeenii baabiyeyna waa qodobkaasi muhmalka la galiyey ee lama taabtaanka ahaa”

Xildhibaan Ibraahim Ciise Buux oo isna arrimahaasi ka hadlaya waxa uu yidhi: “Waa laga rabaa xukuumada inay bakhtiiso waxyaalaha jira wixii ka itaal roona ay la kaashato hay’adaha ku shaqada leh ee Guurtidu u horayso”.

Xildhibaan Caydiid Axmed Obsiiye ayaa isna ku dooday in dalka dadka ka taliyaa ay yihiin da’da sodomeeyada oo aan arag dhibaato iyo balaayo, isla markaana ku aqliyeystay nabadda, waxaanu sheegay in bariigii hore marka dhibaato la maqlo la sasi jiray oo la dareemi jiray dhibaatadu inta ay leegtay, sidaa darteed loo yeedho ragii wax soo arkey ee balaayooyinka bakhtiin jiray ee waayo araga ahaa.

“Anigu imika waxaan leeyahay arrintaasi wada hadalka ee Soomaaliya malaha sideenii hore ayaa la noo qaatay oo Soomaaliya waxba inooma ogola, inaguna ma ogolin Soomaaliya, wax meeshaa inoo yaalaa ma jirto, waar ma iska xidhnaa wadadda wada hadalka, waxaan soo jeedinayaa in aynu ka noqono wada hadalkaasi oo diidmadeenii hore ku noqono ”ayuu soo jeediyey Xildhibaan Caydiid Axmed oo ka hadlayey siyaasada arrimaha dibadda

Xildhibaan Faadumo Jaamac ayaa iyaduna ka hadashay in dumarka la taageero, maadaama oo dumarkii doorashada ka qaybgalay ku hadheen, kootadii dumarkan la diiday in loo baahan yahay in xuquuqda dumarka hoos loo eego.“dumarku miyeyna xaq ku lahayn Somaliland, waad ogaydeen haweenkii doorashadda galay halkii lagaga tagay, Kootadiina waa loo diiday oo la yidhi waa qayral dastuuri wax walba dib u eegis bay u baahan yihiin waa in la eegaa dumarkii iyo xaquuqdoodda”ayey tidhi Xildhibaan Faadumo Jaamac Ileeye,  mar ay ka hadlaysay siyaasadda Arrimaha dibadda waxay tidhi “nin baa laga hayey hasha maangayga gadaye ma masaar bay liqday, waxaan filayaa caruurtuna way garanaysa halka ay ku ragaaday siyaasadii arrimaha dibadda Somaliland ama loogu talogalay waxa fiican in runta loogu tago siday wax u jiraan”.

Xildhibaan Dayib Axmed Faarax ayaa sheegay inay xukuumadani tahay bilaa garab aan haysan wixii ay ku duuli lahayd, “ Siyaasadii arrimaha guduhu waxay maraysa halkii ugu xumayd waayo dawladihii ka horeeyey tan maanta jirta waxay ku duuli jirtay garbaha Guurtidda, xukumadani waxay siyaasadii arrimaha gudaha u haysata wasiiro, wasiiraduna waa kuwii laga cabanayey ee dadku iska ilaalinayey, ilaa hadda waxyaalaha jira wax ay wax ka qabteena ma jirto”

Xildhibaan Farxaan Xuseen Ubaxle ayaa isna yidhi “waxaan soo jeedin lahaa in marka arrimahan oo kale la xalinayo la kaxaysto Guurtida iyo madax dhaqameedka, imika wasiirada looma gali karo xafiisyadooda anagoo xildhibaano ah ayaan gali karin marka si loo helo ayaa adag, marka way kala go’an yihiin dadkii iyo wasiiradda”

Mar uu ka hadlayey wada hadalka Somaliland iyo Soomaaliya waxa uu yidhi” Soomaaliya waxa loola hadlayaa in wixii inaga dhexeeyey looga wada hadli lahaa, hantidii inaga dhexeeyey loo qaybsan lahaa, dad walaalo ah oo jaar ah u noqon lahayn uun baa laga wada hadlayaa, laba dawladood oo simana u wada hadli lahayn xuduud la yaqaana waynu leenahay oo mid afrika oo dhan ka dhexeeya oo lagu heshiiyey ayaa jira”.

Guud ahaan doodda Xildhibaanadda Guurtidda ayaa dhaliilo badan usoo jeediyey wasaaradda Arrimaha gudaha iyo Dibadda, sidoo kale ka hadlay qodobkii ay xukuumadda Somaliland labadda gole Baarlaamaan u fasaxeen inay shirarka Soomaaliya ka qaybgali karto, qodobkaasi oo ay dhaliileen soona jeediyeen in dib loo eego.

Barkhad-Ladiif  M. Cumar, Hiiraan Online 
barkhadladiif@hiiraan.com 
Hargeysa, Somaliland





Post your comments

2013-01-14 12:31 PM EST
Isniin, Jannaayo 14, 2013 (HOL) — Wasiirka arrimaha gudaha ee Somaliland, Maxamed Nuur Carraale (Duur) iyo wafdi uu hoggaaminayo ayaa maanta gaaray magaalada Saylac oo ay dhawaan ka dhaceen rabshado sababay khasaare nafeed oo dhimasho iyo dhaawac isugu jirta.

2013-01-14 12:09 PM EST
Isniin, Jannaayo 14, 2013 (HOL) —Magaalada Bujumbura ee xarunta dalka Burundi ayaa waxaa maanta ka furmay tababar dhowr casho soconaya oo la siinayo 120 ka mid ah shaqaalaha rayidka ah ee dowaldda Soomaaliya, kaas oo uu soo qabanqaabiyay ururka Midowga Afrika, iyadoo shaqaalahaas ay baran doonaan maamulka dowladnimo iyo hab-maamuuska shaqada.

2013-01-14 12:09 PM EST
Isniin, Jannaayo 14, 2013 (HOL) —Al-shabaab ayaa soo bandhigtay maanta oo Isniin ah askari Faransiis ah oo ay ku dileen weerarkii fashilmay ee ka dhacay habeenkii Sabtidu soo galaysay deegaanka Buulo-Mareer ee gobolka Shabeellada Hoose.

2013-01-14 8:24 AM EST
Isniin, Jannaayo 14, 2013 (HOL) — Ciidamada ammaanka ee dowladda Soomaaliya ayaa in ka badan 400-qof ku qabqabtay howlgallo saf-ballaaran ay maanta ka sameeyeen degmooyinka Huriwaa iyo Yaaqshiid ee gobolka Banaadir, iyadoo qaar ka mid ah dadkaas lasii daayay.

2013-01-14 7:50 AM EST
Isniin, Jannaayo 14, 2013 (HOL) — Golaha Wakiiladda Somaliland, ayaa maanta Wasiirka Qorsheynta Qaranka, Sacad Cali Shire ka dhagaystay xeerka tirokoobka dadweynaha reer Somaliland oo xukuumaddu doonayso inay dalka ka hirgaliso Diiwaangelin madani.

2013-01-14 7:44 AM EST
Isniin, Jannaayo 14, 2013 (HOL) — Xarakada Al-shabaab ayaa sheegtay inuu dhintay askari Faransiis ah oo ay dhaawac ahaan u qabteen intii uu socday howgalkii fashilmay ee Faransiisku ay ku qaadeen deegaanka Buulo-Mareer ee gobolka Shabeellada Hoose, iyagoo sheegay inuu weli nool yahay Denis Allex oo ahaa sarkaalkii la doonayay in xoog lagu furto.

2013-01-14 7:27 AM EST
Isniin, Jannaayo 14, 2013 (HOL) — Ciidamada booliiska Puntland ee gobolka Mudug ayaa maanta kala eryay dad-weyne isugu soo baxay bartamaha magaalada Gaalkacayo, islamarkaana qorsheynayey in ay dhigaan muddaaharaad looga soo horjeedo xukuumadda madaxweyne Cabdiraxmaan Faroole.

2013-01-14 7:25 AM EST
Isniin, Jannaayo 14, 2013 (HOL) — Wasaaradda Caafimaadka Somaliland, ayaa shaacisay in gobolka Maroodi jeex uu ka dilaacay cudurka jadeecadda, waxaanay bulshadda Somaliland gaar ahaan kuwa ku dhaqan gobolkan inay goobaha caafimaadka yimaadaan si loo xakameeyo cudurkan oo aanu dalka ugu fidin.

2013-01-14 3:48 AM EST
Isniin, Jannaayo 14, 2013 (HOL) — Ciidamada maamulka Galmudug ee koonfurta magaalada Gaalkacyo ayaa dhaawacay ilaa sedex maxbuus oo dooneysay in ay ka baxsato xabsi ku yaal degmadaasi.

2013-01-14 1:22 AM EST
Isniin, Jannaayo 14, 2013 (HOL) — Wasiirka gaashaandhigga Soomaaliya, C/xakiin Maxamuud Xaaji Fiqi ayaa sheegay in howgalkii Faransiisku uu ka fuliyay deegaanka Buulo-mareer ee gobolka Shabeellada Hoose aan lagu soo wargelin dowladda Soomaaliya, wuxuuna ku tilmaamay howgalkaas mid ay dowladda Soomaaliya si aad ah u cambaareynayso.

2013-01-14 1:21 AM EST
Isniin, Jannaayo 14, 2013 (HOL) — Guddoomiyaha gobolka Banaadir, ahna duqa Muqdihso Maxamuud Axmed Nuur (Tarsan) ayaa uga digay dhallinta Soomaaliyeed ee ka yimid qurbaha inay waxyaabo anshaxa diinta iyo tan dalka ka baxsan ku sameeyaan xeebta Liido.

2013-01-14 1:18 AM EST
Isniin, Jannaayo 14, 2013 (HOL) — Madaxweynaha Mareykanka Barack Obama ayaa sheegay in taageero kooban ay ku siiyeen ciidamadii Faransiiska ahaa ee howgalka ka sameeyay deegaanka Buulo-mareer oo lagu haystay sarkaal Faransiis ah oo la doonayay in la furto inkastoo uu howlgalkaas fashilmay.