2014-08-27
Today from Hiiraan Online:  _
Wararka Maanta- Khamiis, Jan 10, 2013
Ciidamada Ammaanka dalka Jabuuti oo Toogasho ku dilay Wiil 14-jir ah oo ka qayb-qaadanayay Mudaaharaad Nabadeed


Khamiis, Jannaayo 10, 2013 (HOL) — Ciidamada ammaanka Jabuuti ayaa ku dilay toogasho wiil 14-jir ah kaddib markii ay rasaas ku fureen mudaaharaad nabadeed oo ka dhacayay magaalada Obokh, iyadoo rasaastaas ay tiro kale oo dad ah ku dhaawacmeen, sida ay shaacisay hay’ad u doodda xuquuqda aadanaha oo magaceeda loosoo gaabiyo FIDH.

Falkan oo dhacay 30-kii bishii December ee sannadkii 2012 oo ku beegnayd toddobaadkii hore, ayaa waxaa cambaareeyay hay’adaha xuquuqda aadanaha ee ka jira dalka Jabuuti, iyagoo dowladda ku eedeeyay inay six un ula dhaqantay dad dibadbax nabadeed dhigayay.

“Maalin Axadda oo ay ku beegnayd 30-kii Diseember, waxaa magaalada Obokh isugu soo baxay caruur arday ah oo ka cabanayay arrimo ku saabsan kaabayaasha ciyaaraha oo ay magaaladaas ku liidato. Balse nasiib-darro ciidamada ammaanku waxay ku fureen rasaas, taasoo keentay inuu ku dhinto wiil 14-jir ah oo lagu magacaabi jiray, Xafez Maxamed Xasan,” ayay hay’addu ku sheegtay war-saxaafadeed ay soo saartay. 

Sidoo kale, dadka ku dhaawacmay shilkaas waxaa ka mid ah, Axmed Max’ed Cali, Cali Kanaano Barqo, Cali Cumar, Faadumo Ibraahim Muuse, Haashim Xasan Maxamed, Xasna Maxamed Cali, Cumar Maxamed Cali, Cali Maxamed Cali iyo Caasho Diini oo ah haweeney 70 jir ah oo ka mid ah dadka Obokh ku nool, iyadoo la sheegay in qaar ka mid dhaawacyada ay xaaladoodu tahay mid aad khatar u ah.

“Dhacdadan waa mid mas’uuliyad-darro ah oo ay ku kaceen ciidamada dalka Jabuuti, waana fal aan loo cafinayn. Markii ay ciidamada xoogu ugaarsadaan caruurta taasi waxay caddeyn u tahay in xadgudubyada xuquuqda aadanaha ay meel sare gaartay,” ayuu yiri Suhayr Bel-Xasan oo ah madaxa hay’adda warbixinta soo saartay ee FIDH.

Ugu dambeyn, hay’aduhu beesha caalamka ka dalbadeen in Jabuuti lagula xisaabtamo falkan oo ah mid meel-ka-dhac ku ah xuquuqda aadanaha, iyagoo sidoo kale ka dalbaday dowladda Jabuuti inay xushmeyso xuquuqda aadanaha.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-01-10 2:17 PM EST
Khamiis, Jannaayo 10, 2013 (HOL) — Wararka naga soo gaaraya degmada Saylac ayaa sheegaya in munaasabadii xil-wareejinta Maayarka cusub ee degmadaas ay si wanaagsan ugu dhacday xarunta barasaabka gobolka Selel waxaana kasoo qayb-qalay xil-wareejintan saraakiil ka socotay wasaaradda arrimaha gudaha Somaliland iyo mas’uuliyiin kale.

2013-01-10 2:16 PM EST
Khamiis, Jannaayo 10, 2013 (HOL) —Isbitaalka lagu daweeyo cudurka qaaxada (TB-da) ee magaaladda Laascaanood ee xarunta gobolka Sool ayaa maanta la gaarsiiyay deeq lacageed oo loogu talo-galay in lagu quudinta dadka lagu daweynayo isbitaalkaas.

2013-01-10 10:06 AM EST
Khamiis, Jannaayo 10, 2013 (HOL) — Madaxweynaha Soomaaliya, Xasan Sheekh Maxamuud ayaa maanta kula kulmay xarunta madaxtooyada Soomaaliya wafdi ka socday Bankiga Adduunka, isagoo u sheegay inay diyaar u yihiin inay qayb ka noqdaan Bankiga Adduunka kaddib labaatan sano oo colaado ah.

2013-01-10 9:11 AM EST
Khamiis, Jannaayo 10, 2013 (HOL) — Afhayeenka AMISOM, Col. Cali Aadan Xumud oo u dhashay dalka Jabuuti ayaa sheegay maanta oo Khamiis ah in ciidamada Midowga Afrika ee howgallada kawada gudaha Soomaaliya ay guulo la taaban karo ka gaareen, isagoo sidoo kale sheegay in ciidamada dowldda Soomaaliya hadda kaddib lagu tababari doono gudaha dalka.

2013-01-10 8:59 AM EST
Khamiis, Jannaayo 10, 2013 (HOL) — Dowladda Maraykanka ayaa shan milyan oo doollar dul-dhigtay laba ruux oo u dhashay dalka Suudaan oo la rumeysan yahay inay ka barbar dagaalamaan Al-shabaabta Soomaaliya, iyadoo saraakiil Mareykanka u hadlay ay sheegeen in ruuxii xogta labadan qof keena ay siinayaan lacagtaas.

2013-01-10 3:49 AM EST
Khamiis, Jannaayo 10, 2013 (HOL) —Magaalada Kismaayo ayaa waxaa ka socoto qabanqaabadii ugu danbeeysay oo loogu jiro in dib loo ambaqaado shirkii maamul u sameynta gobollada Jubooyinka kaasoo mudooyinkii u danbeeyay uu hakad ku yimid.

2013-01-10 3:44 AM EST
Khamiis, Jannaayo 10, 2013 (HOL) — Ciidamada Midowga Afrika ee AMISOM ayaa sheegay inay tababarro siinayaan shaqaalaha rayidka ah ee dowladda si ay sare ugu qaaddo aqoonta shaqaalaha kala duwan ee hay’adaha dowladda Soomaaliya, iyagoo sheegay inay tani qayb ka tahay howlaha ay u joogaan Soomaaliya.

2013-01-10 3:07 AM EST
Khamiis, Jannaayo 10, 2013 (HOL) — Kooxo hubeysan islamarkaasina ku labisan dareeska ciidamada dowladda federaalka Soomaaliya ayaa dhibaatooyin ba’an ku haya gaadiidka rakaabka ee isticmaala qeybo katirsan gobolka Shabeelaha hoose.