2014-08-01
Today from Hiiraan Online:  _
Wararka Maanta- Isniin, Feb 18, 2013
Ciidammo ka tirsan kuwa Dowladda Somalia oo tababaray kusoo qaatay dalka Uganda oo kusoo laabtay Muqdisho (SAWIRRO)



Isniin, Feberaayo 18, 2013 (HOL) —  Ciidammo ka tirsan kuwa dowaldda Soomaaliya oo lagu soo tababaray dalka Uganda ayaa dib ugu soo laabtay maanta magaalada Muqdisho, iyadoo garoonka diyaaradaha ay si weyn loogu soo dhaweeyay.

Ciidamadan oo noqonaya dufcaddii ugu horreysay oo dalka soo gaara tan iyo markii ay dhalatay dowladda Soomaaliya ayaa tiradoodu waxay ka badan tahay 500 oo askari, waxayna soo qaateen intii ay tababarka ku jireen casharro ku saabsan sida loola dagaalamo kooxaha hubeysan ee dhuumaaleysanaya iyo tababarro uu ka mid yayay caafimaadka.

Wasiirka gaashaandhigga Soomaaliya, Cabdixakiim Maxamuud Xaaji Fiqi oo la hadlay saxaafadda markii ay ciidamadan soo degeen kaddib ayaa sheegay in ciidamadan ay isugu jiraan, saraakiil, saraakiil xigeenno; isagoo askartan ugu hambalyeeyay sida wanaagsan oo ay tababarkooda u soo dhameysteen.

“Xukuumadda Soomaaliya waxay ahmiyad siinaysaa dib u dhiska ciidamada qalabka sida, taasina waxaa caddeyn u ah inaan halkan u joogno sidii aan ku soo dhaweyn lahayn ciidamad,” ayuu yiri Maxamuud Fiqi.

Sidoo kale, wasiirku wuxuu intaasi ku daray in imaashaha ciidamadan ay wax weyn ka badeli doonaan xaaladda amaanka ee uu dalka ku sugan yahay, isagoo xusay in ciidamadani ay si wanaagsan tababarkoosa kusoo qaateen.

“Waxaad dalka gudihiisa ku qaadan doontaan tababar muddo kooban socon doona, kaasoo aad ku baran doontaan waddaniyadda iyo sidii aad shacabka ugu adeegi lahaydeen,” ayuu wasiirka difaacu hadalkiisa ku daray.

Ciidamadan ayaa waxay muddo lix bilood ah tababar ku qaadanayeen xero ciidan oo ku taalla galbeedka magaalada Kampala ee dalka uganda, iyagoo tababarka loo qaaday intii ay jirtay dowladdii KMG ahayd ee Soomaaliya.


Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-02-18 1:38 PM EST
Isniin, Feberaayo 18, 2013 (HOL) — Kulan ay kasoo qaybgaleen odoyaasha dhaqanka, boqorrada, salaaddiinta, culimaudiinka, siyaasiyiinta iyo aqoon-yahannada Soomaaliyeed oo lagu taageerayay golaha salaaddiinta Soomaaliyeed ayaa lagu qabtay hoteelka Mubaarak ee magaalada Muqdisho.

2013-02-18 12:48 PM EST
Isniin, Feberaayo 18, 2013 (HOL) — Guddoomiyaha baarlamaanka Somalia iyo wafdi uu hoggaaminayo oo booqasho ku jooga magaalada Jigjiga ee deegaanka Soomaalida Itoobiya ayaa maanta kormeeray jaamacadda Jigjiga iyo kuulliyadaha waxbarashada iyo caafimaadka.

2013-02-18 12:04 PM EST
Isniin, Feberaayo 18, 2013 (HOL) — Gellinkii dambe ee maanta saacaddu markii ay ahayd 4:00 galabnimo ayaa ciidamada dowlada oo wata gaari kuwa dagaalka ah waxay gaarigooda kasoo dejiyeen madaxa nin ay soo gowraceen , iyadoo goobta ay isugu yimaadeen dadweyne fara badan oo daawanayay madaxaas bani’aadam.

2013-02-18 11:48 AM EST
Isniin, Feberaayo 18, 2013 (HOL) — Wasiirka arrimaha gudaha Soomaaliya, Cabdikariim Xuseen Guuleed ayaa maanta Muqdisho kula kulmay danjiraha Baritain u fadhiya Soomaaliya, Matt Baugh iyadoo labada mas’uul ay kawada hadleen arrimo ay ka mid yihiin, sidii dowladda Britain ay uga qayb-qaadan lahayd xoojinta ammaanka Soomaaliya iyo mashaariic lagu horumarinayo gobollada iyo degmooyinka dalka.

2013-02-18 7:49 AM EST
Isniin, Feberaayo 18, 2013 (HOL) — Ciidamada Soomaaliya iyo Itoobiya ayaa waxay weerar ku qaadeen goobo ay fariisamo ku lahaayeen xoogagga Al-shabaab oo la kala yiraahdo, Bulo-barako, Bootis, Goorisane iyo Mannaas, waxaa la sheegayaa in dhammaan goobahaas ay la wareegeyn ciidamada huwanta.

2013-02-18 7:24 AM EST
Isniin, Feberaayo 18, 2013 (HOL) — Xisbiga Muxaafadka ah ee taladda haya ee KULMIYE ayaa u muuqda mid laba garab u kala safan, ka dib markii masuuliyiin badani sheegeen inay doonayaan inay u tartamaan xilka gudoomiyaha xisbigaasi oo noqon doono musharaxa doorashadda dambe ee madaxtooyadda.

2013-02-18 7:16 AM EST
Isniin, Feberaayo 18, 2013 (HOL) — Iyadoo dhowaan ay wasaaradda caafimaadka ee Puntland ku dhawaaqday in cudurka Duumadu uu ka dilaacay magaalada Boosaaso, ayaa waxaa soo badanaya tirada dadka uu cudurkaasi soo ridanayo.

2013-02-18 6:57 AM EST
Isniin, Feberaayo 18, 2013 (HOL) — Xukuumadda Soomaaliya ayaa sheegtay inay lacag gaaraysa 50,000 oo dollar ay abaalmarin ahaan u siinayso qofkii soo qabto qof dilay wariye. Sidaa waxaa Muqdisho kaga dhawaaqay ra’iisul wasaaraha Soomaaliya, iyadoo tallaabadan ay u muuqato mid looga hortagayo dilalka suxufiyiinta oo joogto ka noqday Soomaaliya sannadihii ugu dambeeyay.

2013-02-18 6:43 AM EST
Isniin, Feberaayo 18, 2013 (HOL) — Ciidamada ammaanka ee Puntland ayaa dhaqdhaqaaq ciidan ka wada deegaanada buuraleyda ah ee galbeedka kaga beegan magaalada Boosaaso ee xarunta gobolka Bari.

2013-02-18 6:29 AM EST
Isniin, Feberaayo 18, 2013 (HOL) — Saraakiisha ciidamada booliska magaalada Baladweyne ayaa warbaahinta u soo bandhigay saddex dhallinyarro ah oo sida ay sheegeen ka soo goostay xarakada Al-shabaab.

2013-02-18 6:19 AM EST
Isniin, Feberaayo 18, 2013 (HOL) — Kulan-diimeen ballaaran oo ay kasoo qayb galeen culimaa'uddiin Soomaaliyeed oo tira badan, islamarkaana loogu magac daray " Maxay u dileen Alle ha dile" ayaa xalay ka dhacay masjidka Al-Huda ee magaalada Garoowe.

2013-02-18 2:25 AM EST
Isniin, February 18, 2013 (HOL) - Kulan lagu taageerayo Xisbiga Mucaaradka dalka Jabuuti ee USN ayaa bishan Feb. 17keedii lagu qabtay magaalada Ottawa ee dalka Kanada. Kulankan oo si wanaagsan loo soo agaasimay ayaa waxaa soo qabanqaabiyey jaaliyadda reer Jabuuti ee ku dhaqan magaalada Ottawa.

2013-02-18 2:13 AM EST
Isniin, Feberaayo 18, 2013 (HOL) — Saraakiisha ciidamada Midowga Afrika ee AMISOM ayaa sheegay inay kulammo wadatashi ah la yeesheen qaar ka mid ah waxgaradka deegaannadii dhawaan laga qabsaday Al-shabaab ee ay ka mid yihiin Janaale, Owdheegle iyo Bariirre oo ka tirsan gobolka Shabeellada Hoose.