2014-11-01
Today from Hiiraan Online:  _
Wararka Maanta- Axad, Aug 25, 2013
Dhaawaac ka dhashay diyaarad siday wafdi ka kooban dowladda federaalka Soomaaliya iyo Ururka Ahlusunna Waljamaaca



Axad, August 25, 2013 (HOL) — Hal qof ayaa ku dhaawacay diyaarad saaka ka qaaday wafdi ka tirsan saraakiisha milateriga dowladda Soomaaliya iyo xubno ka tirsan ururka Ahlusunna Waljamaaca oo si khaldan ugu dagtay garoonka diyaaradaha ee degmada Guri-ceel ee gobolka Galguduud.

Wafdigan oo uu ku jiray abaanduulaha ciidamada xoogga dalka Soomaaliya, Jen. C/risaaq Khaliif Cilmi ayaa u aaday gobolka Galguduud fulinta heshiisyo ay horay u galeen dowladda iyo ururka Ahlusunna Waljamaaca.

“Xubnaha wafdiga oo ka koobnaa taliyeyaal ciidan iyo mas’uuliyiin ka tirsan Ahlusunna waljamaaca oo ay ku jiraan guddoomiyihii hore ee gobolka iyo kan cusub ayaa waxay gaarnay degmada Guriceel,” ayuu yiri abaanduulaha ciidamada xoogga dalka, C/risaaq Khaliif oo ka gaabsaday inuu ka hadlo shilka diyaaradeed.

Diyaaradda ayaa la sheegay in duuliyihii waday uu si khalad ah uga dajiyay garoonka, taasna ay keentay inay jidka ka baxdo uuna ku dhaawacmo hal qof, balse mas'uuliyiintii kale ee wafdiga aysan wax khasaare ah gaarin.

Mas’uuliyiinta wafdiga ayaa intooda kale bad-qaba wax dhibaato ahna aysan soo gaarin, iyagoo si nabad ah diyaaradda uga dagay, waxaana abaaduuluhu uu sheegay inay u tageen gobolkaas fulinta heshiisyadaas.

“Waxaan la kulmaynaa qaybaha bulshada iyo mas’uuliyiinta kale ee ahlusunna, waxaana hirgelinaynaa heshiisyadii horay loo gaaray oo ay ka mid yihiin mideynta ciidamada dowladda Soomaaliya iyo kuwa Ahlusunna,” ayuu abaanduuluhu hadalkiisa ku daray.

Dowladd Soomaailya iyo Ahlusunna ayaa waxay horraantii sannadkan kala saxiixdeen heshiis dhowr qodob ka kooban, kaasoo dhawaan ay xubnaha ugu sarreeya Ahlusunna sheegeen in haddii la fulin waayo ay qaadacayaan.

Ururka Ahlusunna ayaa wuxuu ka mid yahay ururrada ka jira bartamaha dalka Soomaaliya oo xiriirka wanaagsan la lahaa tan iyo markii la dhisay dowladihii dalka soo maray.

Geesta kale, guddoomiyaha cusub ee gobolka Galguduud, Xuseen Cali Wehliye (Cirfo) oo bishii hore xilkan loo magacaabay ayaa sheegay inuu isbedel weyn ka sameyn doono gobolka, uuna isku xiri doono dowladda iyo maamulka halkaas ka taliya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-08-25 2:06 PM EST
Axad, August 25, 2013 (HOL) — Xisbiga DADKA oo ka mid ah xisbiyadii ka qaybgalay doorashadii madaxweynenimo ee Soomaaliya ee dhacday sannadkii hore ee 2012 ayaa warsaxaafadeed uu soo saaray maanta oo Axad ah ku dhaliilay wax-qabadka madaxda dowladda Soomaaliya.

2013-08-25 12:38 PM EST
Axad, August 25, 2013 (HOL) — Warar dheeraad ah ayaa kasoo baxaya shirka magaalada Addis Ababa ee dalka Itoobiya uga socda ergooyinka ka socda dowladda Soomaaliya iyo maamulka Jubbaland, iyadoo wararkii ugu dambeeyay ay sheegayaan in dhinacyadu ay ku heshiiyeen dhowr qodob, balse ay weli jiraan kuwo la isku mari la’yahay.

2013-08-25 10:45 AM EST
Axad, August 25, 2013(HOL) :- Xildhibaan C/rashiid Max’ed xidig oo katirsan mudanayaasha baarlamanka federaalka Soomaaliya ayaa maanta Hotel Qiilmawaaye ee magaalada Kismaayo kulan kula qaatay odoyaasha beesha Jareer weeyne ee degta gobollada Jubooyinka.

2013-08-25 9:15 AM EST
Axad, August 25, 2013 (HOL) — Murrashaxa madaxweynanimada Xisbiga UCID, Jamaal Cali Xuseen, ayaa xukuumadda Somaliland ku canaantay wax ka qabasho la’aanta dooxyadda dul mara Wadadda u dhexeysa Berbera iyo Hargeysa, kaas oo galaaftay nolosha qaar ka mid ah dadweynaha Somaliland oo uu u dambeeyey Suldaan Bare Shire oo dhawr cisho ka hor uu qaatay dooxaasi.

2013-08-25 9:03 AM EST
Axad, August 25, 2013 (HOL) — Madaxweynaha Somaliland, Mudane Axmed Maxamed Maxamuud Siillaanyo, ayaa maanta si qoto dheer uga hadlay dhibaataddda uu leeyahay cudurka Halista badan ee HIV/IADS kaas oo dhibaatooyin badan ku haya caalamka.

2013-08-25 8:48 AM EST
Axad, August 25, 2013 (HOL) — Taliyihii guutada labaad ee ciidanka xoogga dalka Soomaaliyeed, G/sare Cali Guure Afdhuub ayaa lagu aasay maanta oo Axad ah gudaha isbitaalka Madiina ee magaalada Muqdisho, kaddib markii uu u dhintay dhaawac u geystay askari ka tirsan ciidamada xoogga dalka oo isbaato ay u taallay.

2013-08-25 8:37 AM EST
Sabti, August 24, 2013(HOL)—Shirkan oo ay ka qeybgaleen ergooyin badan oo ka kala ytimid dalalka Geeska Afrika ayaa la soo gebagebeeyay, iyadoo ay ka soo baxday natiijo muhiim ah oo

2013-08-25 6:56 AM EST
Axad, August 25, 2013 (HOL) — Ninkan oo kasoo baxsaday saldhigga booliska degmada Bacaad-weyn ee gobolka Mudug ayaa diley labo qof isagoo dhawacay qof kale.

2013-08-25 6:52 AM EST
Axad, August 25, 2013 (HOL) — Shir ballaaran oo ay isugu yimaadeen qaar ka mid ah bulshada Soomaaliyeed sida culummaa'uddiinka, odayaasha, dhallinyarada, haweenka, xildhibaannada baarlamaanka qaarkood iyo qurbo-joog kana dhacay hoteelka Jaziira ee Muqdisho ayaa waxaa lagu taageeray go'aankii 22-kii bishaan kasoo baxay golaha wasiirrada dowladda Somalia ee lagu dalbanayay in xayiraada laga qaado ganacsade Axmad Cali Jimcaale.

2013-08-25 6:20 AM EST
Axad, August 25, 2013 (HOL) — Sheekh Maxamed oo ah guddoomiyaha ugu sarreeyo maxkamadda degmada Baydhabo ee gobolka Bay ayaa laba habeen oo isku xigta waxaa guriga uu ka daggan yahay degmadaas lagu weeraray bam-gacmeed.

2013-08-25 6:12 AM EST
Axad, August 25, 2013 (HOL) — Maamulka gobolka Hiiraan ayaa ka bilaabay xaafaddaha ay ka kooban tahay magaalada Baladweyne howlgal isugu jiray nidaamka deriseynta iyo tirkoob lagu sameynayo tirada dadka ku dhaqan xaafaddaha magaalada.

2013-08-25 2:52 AM EST
Axad, August 25, 2013 (HOL) — Inkastoo wadahadallada dowladda Soomaaliya iyo maamulka Jubbaland uga socday magaalada Addis Ababa ee xarunta dalka Itoobiya ay ahaayeen kuwo aanay warar badan kasoo baxayn ayaa haddana waxaa la sheegay in shalay gellinkii dambe lagu kala dareeray.

2013-08-25 2:11 AM EST
Axad, August 25, 2013 (HOL) — Maxkamadda sare ee Masar ayaa maanta oo Axad ah dhegeysaneysa dacwad ka dhan ah saddex kamid ah hoggaamiyeyaasha sar-sare ee ururka Ikhwaanul Muslimiinka, kuwaas oo kala ah hoggaamiyaha guud ee ururka Muxammad Badiic iyo labo nin oo ku-xigeeno u ah, laguna kala magacaabo Kheyrat Shaadir iyo Rashaad Biyuumi.