2014-04-23
Today from Hiiraan Online:  _
Wararka Maanta- Isniin, Aug 12, 2013
“Jaamacadda Bay Waxay leedahay Kambiyuutarro & sheybaar ay Ardaydu wax ku bartaan” WAREYSI GAAR AH (SAWIRRO)


Isniin, August 12, 2013 (HOL) — Hormuudka jaamacadda Bay oo dhawaan laga furay magaalada Baydhabo, Jabriil Maxamed Aadan ayaa wuxuu ka war-bixiyay jaamacadda iyo habka ay ardayda wax u barto, iyadoo wareysi uu siiyay HOL uu kaga hadlay arrimo ay ka mid yihiin waxbarashada jaamacadda. Wareysigiina wuxuu u dhacay sidan:

Su’aal: Ma inoo sheegi kartaa waxa idinku dhaliyay inaad Jaamacaddan ka furtaan magaalada Baydhabo?.

Jawaab: Markaan darisnay baahida waxbarasho ee ka taagan gobolka Bay iyo gobollada dariska la ah ayaa waxaa inoo soo baxday inay jirto baahi ku aaddan waxbarashada sare taasoo markii dambe aan wax iska weydiinnay; waxaana inoo soo baxay inaan furno Bay University, annagu waxaanu nahay dhallinyaro deegaanka ah oo waxbarasho kusoo qaatay gudaha iyo dibada dalka, marka waxaa ALLE mahaddiis ah inaan garowsannay inaan aqoontii aan soo barannay kula so laabanno dalka, wixii aan baranayna aan u gudbinno walaalaheen halkan ku sugan.

Su’aal: Jaamacadda Bay, imisa maaddo ayaa idiin qorsheysan inaad ku bixisaan. Imisa macallin ayaana ka howlgasha?

Jawaab: Intaan u gudbin jawaabta waxaa iga xasuus ah in jaamacaddan la furay 6/05/2013, waxaana noo qorsheysan inaan ka dhigno 7-kulliyadood  oo kala ah: BA, IT, Nurse iyo Lab, Medicine & Surgery (MBPS), Public health, darasaadka islaamka iyo Social Science-ka; waxaana ka hawlgala 12 macallin oo aqoontoodu ay tahay heer jaamacadeed oo aad u sareysa.

Su’aal: Ardeyda qaab sidee ah ayaad ku xulateen? Waana sidee xiriirka idin kala dhexeeya dugsiyada sare ee ka jira magaalada Baydhabo iyo gobolka Bay oo dhan?

Jawaab: Marka hore waxaan kuu caddeynayaa in xiriir wanaagasan aan la leenahay dugsiyada sare ee ka jira Baydhabo; macallimiinta ka hawl-gala dugsiyada sare ee magaaladan qaar ka mid ah jaamacadda ayay wax ka bartaan. Midda kale ardayda waxaan ku xulunaa ardayga marku kasoo baxo dugsiga sare, shahaadadiisana ay cusub tahay waqti dheerna aysan u dhexeyn markii uu shahaada qaatay iyo xilliga u noo yimid. Markaas kaddib ayaan waxaan marsiinnaa imtixaan kale, haddii uu ku guuleystana si toos ah ayuu u fariistaa fasalka jamacadeed. Tan kale ardayga haddii uu waqti ay u dhaxeyso markii uu shahaada qaatay iyo marka uu noo yimaado waxaan marsiinnaa diyaar-garow jaamacadeed annagoo kasoo dhisna aasaaska, si gaar ah waxaan uga dhisnaa maaddooyinka sayniska iyo xisaabta.

Su’aal: Ardayda qaabkee ayaad ku qaadatiin, ma jirtase mudnaan aad kala siisaan ardayda deegaannada kala duwan kasoo wada jeeda? Mase jirtaa deeq wax-barasho oo jaamacaddiisu ay siiso cidda aan awoodin inay iska bixiso kharshaadka waxbarshada jaamacadeed?

Jawaab: Waa su’aal wanaagsan! annaga ardayda uma fiirinno heyb iyo gobol toona mana raad-raacno, muhiimna nooma ahan ardeyga deegaanka uu ka soo jeedo. Ardey kasta waan soo dhaweynaa kaliya waxaan ku qiimeynnaa kalintiisa waxbarsho annagoo ardayda kaalinta koowaad iyo labaad gala aan siinno deeq waxbarasho oo jamacadeed,  sidoo kale waxaan waxbarasho aan lacag ahayn aan siinnaa seddex qof oo ka shaqeya isbitaalka guud ee degmada Baydhabo, kuwaasoo aan barno caafimaadka.

Su’aal: Ka waran xariirka aad la leedihiin jamacadaha dalka gudihiisa ku yaalla iyo kuwa dibadda?

Jawaab: Waxaan xiriir fiican la leennahay jaamacado kala duwan oo ku kala yaalla gudaha dalka iyo dibaddiisa. Waxaan ka xusi karaa jaamacadaha ku yaalla gudaha dalka SIMAD, Plasma, Horseed iyo kuwo kale. Jaamacadaha dibadda ku yaalla ee aan xiriirka leennahay iyagana waxaa ka xusi karaa jamaacado ku yaalla dalalka Pakistan, Bangladesh iyo qaar ka tirsan dalalka carabta, waxaana qorsheyneynaa inaa xariir wanaagsan la yeelano kuwa ku yaalla dalalka Afrika iyo Yurub.

Su’aal: Ma inoo sheegi kartaa tirada ardayda dhigata jaamacadda Bay ee magaalada Baydhabo? Qorshahiina mustaqbalka fogna waa maxay?

Jawaab: Ardayda dhigata Jaamacadda waa 150-ardey oo aan ku furnay, welina waxaan wadnaa diiwaan-gelinta ardayda. Markaan mustaqbalka waxa aan rajeynayno aan ka hadlo waxa weeye… dhawaan inaan bilowno muddo kooban oo waxbarasho ah oo baxaysa dhammaadka toddobaadka walba, taasoo aan ugu talogalnay dadka shaqeysta ee aan imaan karin jaamacadda  maalin walba. Jaamacaddu waxay leedahay sheybaar casri ah iyo kombiyuutarro aan ardayda wax ku barno. Dhawaanna waxaan kusoo kordhin doonnaa qalab kale oo casri ah.

Ugu dambeyn, waxaa qorsheynaynaa inaan faracyo ku yeelanno gobollo kala duwan oo dalka ka tirsan sida: Bakool, Gedo, Jubbada dhexe, Jubbada hoose, Shabeellada hoose, Shabeellada dhexe iyo gobolka Hiiraan.

W/Wareystay Wariye: Ismaaciil Farxaan

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-08-12 1:39 PM EST
Isniin, August 12, 2013 (HOL) — Kulan looga hadlayay ammanka gobolka Bay ayaa maanta ka dhacay degmada Baydhabo, kaasoo ay ka qaybgaleen mas’uuliyiinta maamulka gobolka, kan degmada, waxgarad iyo aqoon-yahanno kasoo jeeda gobolkaas.

2013-08-12 11:28 AM EST
Isniin, August 12, 2013(HOL)—Xaflad si qurux badan loo soo agaasimey ayaa lagu qabtey gelinkii danbe ee shalay xaruunta Ark Academy oo ku taal xaafada Wembley Park ee magaalada London, xafladaasi oo lagu daahfurayay furitaanka koobka cayaaraha Somaliweek London 2013.

2013-08-12 11:15 AM EST
Isniin, August 12, 2013(HOL) :- Ergadii soo dooratay madaxweeynaha maamulka Jubbaland Sheekh Axmed Max’ed Islaam (Axmed Madoobe) ayaa 20 beri oo dheeri ah ugu daray madaxweeynaha si uu u dhameystiro dhismaha labada gole ee maamulka.

2013-08-12 10:28 AM EST
Isniin, August 12, 2013 (HOL) — Madaxweynaha dalka Zimbabwe, Robert Mugabe oo mar kale loo doortay inuu hoggaamiyo dalkaas ayaa khudbad uu jeediyay maanta ku sheegay in dalkiisu uusan dib dambe ugu laaban dooni gumeysi, isagoo doorashadii dhawaan dhacday ku tilmaamay mid u dhacday si dimuqraadiyad ah.

2013-08-12 10:02 AM EST
Isniin, August 12, 2013 (HOL) — Madaxweynaha Puntland oo ka qaybgalay shir looga hadlayay xawaaladaha iyo sida loola socon lahaa in lacagaha la isugu diro aan loogu adeegsan lahayn falal dambiyeedyo oo maanta lagu qabtay Garoonka ayaa ka digay in la xiro xawaaladaha lacagaha la isugu diro.

2013-08-12 9:46 AM EST
Isniin, August 12, 2013 (HOL) — Waxaa heer gabo-gabo ah maraya qeybtii koowaad dhismaha masjidka Bardaha magaalada Baladweyne oo ah masjid facweyn oo soo dhisnaa sida la rumeysan yahay wax ka badan 100 sano.

2013-08-12 7:54 AM EST
Isniin, August 12, 2013 (HOL) — Guddoomiyaha baarlamaanka Soomaaliya, Maxamed Sheekh Cismaan (Jawaari) iyo wafdi uu hoggaaminayo ayaa maanta gaarya magaalada Kampala ee dalka Uganda, kaddib casuumaad ay ka heleen guddoonka baarlamaanka dalkaas.

2013-08-12 7:30 AM EST
Isniin, August 12, 2013 (HOL) — Jaamacadda ADMAS University College, ayaa xalay xaflad Casha sharaf ah u samaysay toddoba arday oo hore uga qalin jabiyey jaamacadda oo deeq waxbarasho (Shoolership) ka helay dalka Turkey.

2013-08-12 6:52 AM EST
Isniin, August 12, 2013 (HOL) — Munaasabado lagu furayey machadyo diini ah ayaa lagu qabtay magaalooyinka Yeyle oo ku dhawaad 100-KM Waqooyi-galbeed kaga xigta magaalada Laascaanood iyo Boocame oo 75-KM dhinaca Bari kaga beegan Laascaanood.

2013-08-12 3:01 AM EST
Isniin, August 12, 2013 (HOL) — Afhayeenka howgallada ururka Al-shabaab, Sheekh C/casiis Abuu-Muscab ayaa hadal uu siiyay warbaahinta afkooda ku hadasha wuxuu uga digay shacabka Muqdisho ku nool inay u dhawaadaan saldhigyada ciidamada dowladda iyo kuwa AMISOM ay leeyihiin Muqdsiho iyo weliba xarumaha hay’adaha gargaarka oo uu ka xusay kuwa UN-ka.

2013-08-12 2:26 AM EST
Isniin, August 12, 2013 (HOL) — Xildhibaan Ilyaas Barre Shiil oo ka mid ah xildhibaannada baarlamaanka Kenya ayaa sheegay in Kenya aysan doonayn inay taako ka mid ah dhulka Soomaaliya qabsato, wararka la faafiyayna ay yihiin kuwo been abuur ah oo la doonayo in la isaga horkeeno labada dal iyo labada dowladood.

2013-08-12 2:22 AM EST
Isniin, August 12, 2013 (HOL) — Ra’iisul wasaarihii hore ee DKMG ahayd ee Soomaaliya, Prof. Cali Maxamed Geeddi ayaa dhaliilay dowladda Soomaaliya ee xilka haysa, isagoo sheegay inay ku filnaan waysay inay sugto ammaanka Muqdisho, sidoo kalena ay ugaarsi gaar ah ku hayso qaar ka mid ah beelaha Muqdisho.