2014-04-21
Today from Hiiraan Online:  _
Wararka Maanta- Axad, Aug 11, 2013
Dowladda Soomaaliya oo Maanta Gudoomiye cusub u magacowday Gobolka Galguduud ee Bartamaha Soomnaaliya

Axad, August 11, 2013 (HOL) — Wareegto kasoo baxday xafiiska madaxweynaha Soomaaliya ayaa loogu magacaabay guddoomiyaha cusub ee gobolka Galguduud, Xuseen Cali Wehliye (Cirfo) iyadoo la sheegay in lagu magacaabay soo jeedinta wasiirka arrimaha gudaha Soomaaliya.

Guddoomiyaha cusub ee gobolka Galguduud ayaa la sheegay in wixii maanta ka dambeeya uu la wareegayo xilka guddoomiyenimo ee gobolkaas oo ay ka kala taliyaan maamulllo dhowr ah oo ay ka mid yihiin Ahlusunna, Ximan iyo Xeeb iyo Al-shabaab.

Magacaabiddan ayaa dhacday 27-kii bishii July ee lasoo dhaafay; laakiin uu maanta saxiixay madaxweynaha Soomaaliya, Xasan Sheekh Maxamuud isla maantana lana faafiyay.

“Tallaabadan waa mid qayb ka ah horumarinta maamullada gobollada dalka, maadaama uu waqtigiisii dhammaaday maamulkii hore ee gobolkaa ay u magacowday dowladda Soomaaliya, waxaana magacaabiddan loo cuskaday qodobbada, 18-aad, 90-aad iyo 99-aad ee dastuurka dalka,” ayaa lagu yiri wareegtada.

Dowladdii KMG ahayd ee Soomaaliya ayaa bishii July ee sannadkii hore u magacowday maamul KMG ah gobolka Galguduud, kaasoo uu madax looga dhigay, Axmed Yuusuf Xasan Ciyoow, kaasoo la sheegay inuu xilkiisii KMG ahaa uu dhammaaday.

Maamulka Ahlusunna Waljamaaca iyo maamullada kale ee gobolkaas ka jira ayaan weli ka hadlin magacaabidda ay dowladdu u magacowday mas’uulka cusub maamulka gobolka Galguduud ee bartamaha Soomaaliya. Iyadoo wareegtada aan lagu sheegay mas'uuliyiinta kale ee maamulka gobolka Galguduud.

Dhawaan ayay ahayd markii baarlamaanka Soomaaliya uu meel-mariyay sharciga sameynta maamullada gobollada dalka, inkastoo qodobbo ka tirsan uu diiday madaxweynaha, lagana sugayo baarlamaanku uu wax ka bedel ku sameeyo.

Guddoomiyaha cusub ee gobolka Galguduud, Xuseen Cali Weheliye (Cirfo) ayaa ahaa guddoomiyihii degmada Afgooye intii uu Koonfurta Soomaaliya ka talin jiray Jen. Maxamed Faarax Caydiid, waxaana xilkaas kala wareegay maamulkii Maxkamadaha Islaamka ee dalka ka curtay sannadkii 2006.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-08-11 9:23 AM EST
Madaxii hore ee sirdoonka Soomaaliya ee loo yaqaano nabad-sugida Axmed Macallin Fiqi ayaa waraysi uu siiyay wargeyska The Standard ee kasoo baxa dalka Kenya ku sheegay in uu ka hortagay weeraro la doonayay in lagu khaarajiyo labada hogaamiye ee ugu cadcadaa tartankii doorashadii dalka Kenya.

2013-08-11 9:08 AM EST
Axad, August 11, 2013 (HOL) — Waxaa mar kale lagu qabtay Muqdisho shir ku saabsan Raod-Map-ka xuquuqda aadanaha Somalia, kaasoo ay ka qayb-galeen xoghayaha golaha wasiirrada, Maxamed Jamac Calas, ururrada bulshada rayidka ah iyo danjiraha Soomaaliya u fadhiya xafiiska Qaramada Midoobay xuquuqul insaanka ee Geneva, Yuusuf Maxamed Ismaaciil (Bari-Bari).

2013-08-11 8:43 AM EST
Axad, August 11, 2013 (HOL) — Soddon ka mid ah xildhibaannada dumarka ah ee ku jira baarlamaanka Soomaaliya ayaa maanta u dhoofay dalka Kenya si ay uga qaybgalaan siminnaar aqoon-kororsi ah oo looga hadlayo sida ay u shaqeeyaan baarlamaannada caalamka iyo sidii baarlamaanka Soomaaliya uu xiriir ula yeelan lahaa baarlamaannada kale ee caalamka.

2013-08-11 7:56 AM EST
Axad, August 11, 2013 (HOL) — Iyadoo maanta la filayay in magaalada Kismaayo looga dhawaaqo golaha wasiirada maamulka Jubbaland ayaa waxa arintaasi ku yimid dib u dhac iyadoona mudo 10 maalmood ah dib loo dhigay.

2013-08-11 7:36 AM EST
Axad, August 11, 2013 (HOL) —Iyadoo shalay dowladda Puntland ay dekedda magaalada Boosaaso ka celisey markab sidey deeq raashin ah oo ka timid hay'adda Bisha Cas ee Turkiga, taas oo ku socotey qaar kamid ah degmooyinka Puntland iyo gobollada dhexe ee dalka, ayaa waxaa arintaas siyaabo kala duwan u fasiray siyaasiyiinta mucaaradka ah ee dhaliila xukuumadda Madaxweyne C/raxmaan Maxamed Faroole.

2013-08-11 3:22 AM EST
Axad, August 11, 2013 (HOL) — Orodyahanka Soomaaliyeed ee Mo Farah ayaa ku guuleystay orodka dheer ee 10,000 oo mitir tartanka adduunka eek a dhacaya magaalada Moscow ee xarunta dalka Ruushka.

2013-08-11 2:39 AM EST
Axad, August 11, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa ka hadlay waxyaabihii u qabsoomay xukumadda uu madaxda ka yahay muddadii ay jirtay, isagoo xusay in waxyaabo badan ay ka qabteen dhibaatooyin ka taagnaa magaalada Muqdisho.

2013-08-11 2:00 AM EST
Axad, August 11, 2013 (HOL) — Dowladda Britain ayaa shaacisay in xubno ka tirsan Al-shabaab ay dhaceen gargaar kala duwan oo loogu deeqay dadka Soomaaliyeed, kaasoo qiimihiisu ahaa 480,000 lacagta Britain ah oo la mid ah 75,000 oo doollarka Mareykanka ah.