12/22/2014
Today from Hiiraan Online:  _
Wararka Maanta- Axad, Aug 11, 2013
Ra’iisul Wasaaraha Soomaaliya oo ka hadlay wixii u qabsoomay Xukuumada uu Madaxda ka yahay Muddadii ay jirtay



Axad, August 11, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa ka hadlay waxyaabihii u qabsoomay xukumadda uu madaxda ka yahay muddadii ay jirtay, isagoo xusay in waxyaabo badan ay ka qabteen dhibaatooyin ka taagnaa magaalada Muqdisho.

Mudane Saacid ayaa sheegay in sidoo kale ay ku guuleysteen inay xiriirkii caalamiga ah ee Soomaaliya ay la lahayd dalalka dunida ay soo celiyeen ayna ku guuleysteen in dowladda Soomaaliya la aqoonsado.

“Markii aan halkaan nimid waxaan u nimid meel aysan waxba ka jirin, markii aan howsha billowday waxaan qaadnay 60 isbaaro oo u yaallay dhallinyaro aan waxba ka aqoon wada-noolaashaha iyo dowladnimada taasoo ay ka heli jireen lacago fara badan,” ayuu yiri ra’iisul wasaaraha Soomaaliya.

Qaadista isbaarooyinka ayuu sheegay inay ku yimaadeen dadaallo badan oo ay sameeyeen, isago sidoo kale sheegay inay wax ka qabteen ammaanka guud ee Muqdisho oo uu sheegay inay khatar dhinaca ammaanka ah ka jirtay markii ay xilka wareegayeen.

“Dadaal aad u ballaaran ayaan ku bixinnay sugidda amaanka Muqidsho iyo deegaannada kale ee dalka iyadoo la ogyahay inay jiraan daruufo badan oo dowladda horyaalla. Xukuumaddu waxay diyaarisay qorshe cusub oo lagu saxayo nidaamka ciidammada, iyadoo sidaas aan u dadaalayno haddana waxaa jira daruufo dhinaca dhaqaalaha ah oo dowladda haysta,” ayuu mar kale Saacid oo la hadlayay Radio Muqdisho oo ku hadla afka dowladda.

Siyaasadda arrimaha dibadda ayuu ka hadlay isagoo sheegay in horumarro waaweyn ay xukuumaddu ka gaartay soo celinta xiriirka u dhexeeya Somalia iyo caalamka, wuxuuna xusay in dadaallo badan oo la sameeyay ay taasi ku suurogashay, balse aysan ahayn mid iska timid.

Mar uu ka hadlay dhinaca dhaqaalaha ayuu sheegay inay xakameysay sidii loo xadidi lahaa daqliga dowladda kasoo gala gudaha, isagoo sheegay in bishii Oktoobar ee sannadkii hore ay dowladdu kasoo heshay gudaha ay ahayd laba milyan oo doollarka Mareykanka ah.

Ugu dambeyn, ra’iisul wasaaraha Soomaalihya wuxuu sheegay inay wadaan qorshayaal cusub oo ay wax kaga qabanayaan dib u dhiska dalka iyo sugidda ammaanka, isagoo hadalkiisa ku daray inay sii wadayaan dagaalka ay kula jiraan Al-shabaab.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

8/11/2013 9:23 AM EST
Madaxii hore ee sirdoonka Soomaaliya ee loo yaqaano nabad-sugida Axmed Macallin Fiqi ayaa waraysi uu siiyay wargeyska The Standard ee kasoo baxa dalka Kenya ku sheegay in uu ka hortagay weeraro la doonayay in lagu khaarajiyo labada hogaamiye ee ugu cadcadaa tartankii doorashadii dalka Kenya.

8/11/2013 9:08 AM EST
Axad, August 11, 2013 (HOL) — Waxaa mar kale lagu qabtay Muqdisho shir ku saabsan Raod-Map-ka xuquuqda aadanaha Somalia, kaasoo ay ka qayb-galeen xoghayaha golaha wasiirrada, Maxamed Jamac Calas, ururrada bulshada rayidka ah iyo danjiraha Soomaaliya u fadhiya xafiiska Qaramada Midoobay xuquuqul insaanka ee Geneva, Yuusuf Maxamed Ismaaciil (Bari-Bari).

8/11/2013 8:43 AM EST
Axad, August 11, 2013 (HOL) — Soddon ka mid ah xildhibaannada dumarka ah ee ku jira baarlamaanka Soomaaliya ayaa maanta u dhoofay dalka Kenya si ay uga qaybgalaan siminnaar aqoon-kororsi ah oo looga hadlayo sida ay u shaqeeyaan baarlamaannada caalamka iyo sidii baarlamaanka Soomaaliya uu xiriir ula yeelan lahaa baarlamaannada kale ee caalamka.

8/11/2013 7:57 AM EST
Axad, August 11, 2013 (HOL) — Wareegto kasoo baxday xafiiska madaxweynaha Soomaaliya ayaa loogu magacaabay guddoomiyaha cusub ee gobolka Galguduud, Xuseen Cali Wehliye (Cirfo) iyadoo la sheegay in lagu magacaabay soo jeedinta wasiirka arrimaha gudaha Soomaaliya.

8/11/2013 7:56 AM EST
Axad, August 11, 2013 (HOL) — Iyadoo maanta la filayay in magaalada Kismaayo looga dhawaaqo golaha wasiirada maamulka Jubbaland ayaa waxa arintaasi ku yimid dib u dhac iyadoona mudo 10 maalmood ah dib loo dhigay.

8/11/2013 7:36 AM EST
Axad, August 11, 2013 (HOL) —Iyadoo shalay dowladda Puntland ay dekedda magaalada Boosaaso ka celisey markab sidey deeq raashin ah oo ka timid hay'adda Bisha Cas ee Turkiga, taas oo ku socotey qaar kamid ah degmooyinka Puntland iyo gobollada dhexe ee dalka, ayaa waxaa arintaas siyaabo kala duwan u fasiray siyaasiyiinta mucaaradka ah ee dhaliila xukuumadda Madaxweyne C/raxmaan Maxamed Faroole.

8/11/2013 3:22 AM EST
Axad, August 11, 2013 (HOL) — Orodyahanka Soomaaliyeed ee Mo Farah ayaa ku guuleystay orodka dheer ee 10,000 oo mitir tartanka adduunka eek a dhacaya magaalada Moscow ee xarunta dalka Ruushka.

8/11/2013 2:00 AM EST
Axad, August 11, 2013 (HOL) — Dowladda Britain ayaa shaacisay in xubno ka tirsan Al-shabaab ay dhaceen gargaar kala duwan oo loogu deeqay dadka Soomaaliyeed, kaasoo qiimihiisu ahaa 480,000 lacagta Britain ah oo la mid ah 75,000 oo doollarka Mareykanka ah.