2014-04-16
Today from Hiiraan Online:  _
Wararka Maanta- Isniin, Apr 1 , 2013
Maxkamadda Milatariga Somaliland oo Maanta Xukunno kala duwan ku Ridday 22-qof oo hore u Weerartay Xero Ciidan

Isniin, Abriil 01, 2013 (HOL) — Maxkamadda sare ee ciidamadda Milatariga Somaliland, ayaa xukunno kala duwan ku xukuntay koox dabley ahayd oo sanadkii hore soo weeraray xero ciidanku leeyahay.

Maxkamaddan ayaa wax ka dhintay xukuno hore loogu xukumay kooxdan oo ahaa dil, waxaany ka dhigtay 20 sanno oo xadhig ah, halka kuwo kale oo hore loogu xukumay xabsi daa’in looga dhigay 15 sanno oo xadhiga.

Garyaqaankii u doodayey kooxdan la xukumay Garyaqaan xildhibaan Maxamed Saalax Cige, ayaa noo xaqiijiyey xukunka 22 qof oo xukuno kala duwan lagu xukumay, waxaanu sheegay inay ku doodeen in xukunkii hore ee lagu xukumay ee dilka ahaa la buriyo, isla markaana ay maxkamaddu soo saarto go’aan cusub oo ah in loogu bedelo 20 sanno oo xadhig ah, halka shan ka mid ahna lagu xukumay 15 sanno, halka laba kale oo aanay maxkamadii horana xukumin tan dambana aanay xukumin lagu hayo rumaan, maadaama oo ay dhaawac ahaan xabsiga ugu jireen.

Guleed Axmed jaamac ( dafac) oo ka mid ah ururadda  xuquuqul insaanka Somaliland ayaa xukunkaasi ku tilmaamay mid sharciga waafaqsanayn, maadaama oo ragan la xukumay ahaayeen shacab, isla markaana aanay sharcigu ogoleyn in dad shacab ah ay maxkamad ciidan xukunto.

Si kastaba ha ahaatee, kooxdan la xukumay ayaa sanadkii hore soo weeraray xero ciidan oo ku taalla magaaladda Hargeysa, waxaanay maxkamaddii ciidamadu ku xukumeen 17 ka mid ah dil, halka shan ka mid ah xabsi daa’in, laba kale oo dhaawac ahaana xukun la’aan xabsiga iskaga jiraan, haseyeeshee racfaan laga qaatay xukunkaasi ayaa dib loo galay kiiskooda, waxaanay ka naakhuseen xukunkii hore ee ahaa dilka, isla markaana loogu bedelay 20 sanno, halka shan kalana looga dhigay 15 sano.

Barkhad-Ladiif M. Cumar, Hiiraan Online
barkhadladiif@hiiraan.com
Hargeysa, Somaliland





Post your comments

2013-04-01 2:36 PM EST
Isniin, Abriil 01, 2013 (HOL) — Madaxweynaha Soomaaliya, Xasan Sheekh Maxamuud ayaa sheegay in dhulkii ay dowladdu lahayd wixii ka horreeyay 1991-kii ay weli yihiin dhul ay dowladdu leedahay, isagoo sheegay in markii ay dowladdu u baahato aysan cidna u dhaafay.

2013-04-01 2:06 PM EST
Isniin, Abriil 01, 2013 (HOL) — Xukuumadda Somaliland ayaa sheegtay in dowladda Turkigu ay qabanayso shir lagu sii ambaqadayo wadahadaladdii horay ugu billowday dowladda Soomaaliya iyo Somaliland kuwaasoo muddo ku jiray hakad.

2013-04-01 11:50 AM EST
Isniin, Abriil 01, 2013 (HOL) — Wafdi ka socda dalka Finland ayaa maanta soo gaaray Muqdisho, iyagoo la kulmay mas’uuliyiinta dowladda oo uu ka mid yahay madaxweyne Xasan Sheekh Maxamuud, waxanaa kulanka oo ka dhacay xarunta madaxtooyada looga hadlay intiisa badan iskaashiga iyo xiriirka u dhexeeya Somaaliya iyo Finland.

2013-04-01 9:58 AM EST
Isniin, Abriil 01, 2013 (HOL) — Wararka laga hellayo degmada Buula-burte ee xarunta gobolka Hiiraan ayaa sheegaya in dab xoogan khasaare hantiyeed geystay oo uu qabsaday goobo ganacsi oo ku yaala degmada.

2013-04-01 9:37 AM EST
Isniin, Abriil 01, 2013 (HOL) — Sarkaal ka tirsan ciidamada Uganda ee ka midka ah AMISOM ayaa sheegay inay gobolka Shabeellada Hoose ku dileen sarkaal sare oo ka tiranaa Xarakada Al-shabaab, kaasoo la socda gaadiid ay leedahay Al-shabaab oo marayay deegaanno ka tirsan Shabeellada Hoose.

2013-04-01 9:22 AM EST
Isniin, Abriil 01, 2013 (HOL) — Deeq lacageed ayaa lasoo gaarsiiyay qoys dan-yar ah oo gurigii ay galayeen ama deggenaayeen uu kaga gubtay magaalada Boorama ee gobolka Awdal, iyadoo qoyskaas ay kaalmo deg-deg ah weydiistay walaalahooda Soomaaliyeed.

2013-04-01 9:17 AM EST
Isniin, Abriil 01, 2013 (HOL) — Baarlamaanka Soomaaliya ayaa maanta u yeeray wasiirka arrimaha gudaha iyo amniga Qaranka si wax looga weydiiyo maydad lasoo dhigay waddooyinka Muqdisho, kuwaasoo la sheegay in laga baxay xabsiyo ku yaalla Muqdisho lana toogtay.

2013-04-01 9:10 AM EST
Isniin, Abriil 01, 2013 (HOL) —Ra’iisul wasaaraha Soomaaliya oo dib ugu soo laabtay Muqdisho kaddib socdaal laba maalmood qaatay oo uu ku tagay gobolka Gedo ayaa wuxuu soo saaray wareegto uu ku magacaabay maamul KMG ah oo uu yeesho gobolka Gedo.

2013-04-01 5:58 AM EST
Isniin, Abriil 01, 2013 (HOL) — Nin lagu magacaabo Cabdulaahi Cabdulqaadir Warsame oo muddo 19 maalmood ah afduub loogu haystey magaalada Garoowe ee xarunta maamulka Puntland, ayaa shalay dib xoriyadiisa u helay.

2013-04-01 5:55 AM EST
Isniin, Abriil 01, 2013 (HOL) — Ciidamada booliska ee degmada Garoowe ayaa gelinkii danbe ee shalay gacanta ku dhigay labo nin oo ka tirsanaa koox dabley ah oo asbuucii lasoo dhaafay fal-danbiyeed dhac iyo dil isugu jira ka geystey xarunta xawaaladda KAAH ee magaalada Boosaaso.

2013-04-01 5:48 AM EST
Isniin, Abriil 01, 2013 (HOL) — Madaxweyne Xasan Sheekh Maxamuud ayaa si rasmi ah u furay goor-dhaweyd shirweynaha dib u habeynta garsoorka dalka oo socon doona muddo shan maalmood ah, kaasoo looga hadlayo sida ugu habboon ee garsoorka loogu kalsoonaan karo.

2013-04-01 2:15 AM EST
Isniin, Abriil 01, 2013 (HOL) — Shirweyne qabashadiisa uu ku dhawaaqay madaxweynaha Soomaaliya, Xasan Sheekh Maxamuud bishii Feberaayo ee sannadkan oo looga tashanayo sidii dib u habeyn loogu sameyn lahaa garsoorka dalka ayaa manta ka furmaya Muqdisho.