Monday, May 20, 2013
Today from Hiiraan Online:  _
Wararka Maanta- Isniin, Oct 8 , 2012
Munaasabad lagu Taageeray Ra'iisul Wasaaraha Soomaaliya oo xubno Siyaasiyiin ah ay ku qabteen Magaalada Muqdisho

Isniin, Oktoobar 08, 2012 (HOL) — Magaalada Muqdisho ayaa waxaa maanta lagu qabtay xaflad lagu taageerayo ra'iisul wasaaraha cusub ee Soomaaliya, Cabdi Faarax Shir-doon oo maalin ka hor uu madaxweynaha Soomaaliya u magacaabay xil ra'iisul wasaaraha.

Munaasabaddan hambalyada ah ayaa waxaa Muqdisho ku qabtay siyaasiyiin ay ka mid yihiin xildhibaannadii hore ee baarlamaanka iyo xubnihii isbahaysiga isbedel-doonka Soomaaliyeed oo ay ku jireen murashaxiin xilka madaxnimo isku soo taagay.

"Halkan waxaan u nimid inaan u hambalyeyno soona dhaweynno ra'iisul wasaaraha cusub ee Soomaaliya, Cabdi Faraax Shir-doon, waxaana Alle uga baryaynaa inuu la  garab-galo howshiisa uuna towfiiqda waafajiyo," ayay munaasabadda ka sheegeen xubnihii qabtay.

Xubnahan waxay sheegeen in ra'iisul wasaaraha iyo madaxda kale ee ay shacabku ka sugayaan inay dalka gaarsiiyaan horumar iyo nabad, iyagoo si gaar ah ui xusay in ra'iisul wasaaraha looga baahan yahay inuu isbedel dhab ah la yimaado.

"Dowaldda cusub waa mid laga sugayo inay dalka u horseeddo isbedel dhab ah, waayo 20-sano ka badan ayay dagaallo socdeen; waxaana codsaanynaa in lala yimaado isbedel kaas ka duwan oo dalka barwaaqo iyo horumar u horseeda," ayay yiraahdeen xubnihii halkaas ka hadlay.

Sidoo kale, xubnaha kulankan qabtay ayaa waxay shacabka Soomaaliyeed ugu baaqeen inay la shaqeeyaan dowladda cusub ee Soomaaliya si ay ugu guulaysato howsha hortaalla, si ay dalka u gaarsiiso xilli ay shacabku soo doortaan hoggaankii ay doonayaan.


Caasho Axmed Cabdalla oo ka mid ahayd mudanayaashii hore ee baarlamaanka oo ka hadashay kulanka ayaa ku boorrisay ra'iisul wasaaraha inuu howshiisa koowaad ka dhigo sugidda ammaanka, midda labaadna uu ka dhigo dib u dhiska dhaqaalaha dalka, iyadoo ugu baaqday inuu ka fogaado khilaaf.

"Waxaan Alle ka baryaynaa in madaxda dowaldda oo dhamaantood ah rag cusub ay ummadda u horseedda nabad iyo midnimo, waxaana u sheegaynaa in afarta sano ee ay xilka hayaan ay umaddu ka doonayso isbedel muuqda oo dhab, waxaana ka rajeynayaan dhammaantood inay u adeegaan danta guud ee dalka iyo dadkam" ayay xubnahan yiraahdeen.

Xubnaha kulankan qabtay ayaa waxaa ka mid ahaa: Sheekh Maxamed Yaasiin oo ka mid ahaa murashaxiintii xilka madaxnimo ee Soomaaliya, Ismaaciil Maxamuud Hurre (Buubaa) oo ah xildhibaan hore, Caasho Axmed Cabdalla, Ibraahim dheere iyo xubno kale.

Ugu dambeyn, siyaasiyiintan waxay ku baaqeen in dowladda ay fuliso lixdii qodob ee uu horay u sheegay madaxweynaha Soomaaliya inay dowladda cusub saldhig u noqon doonaan, iyadoo dalbaday in dalka la gaarsiiyo dowladnimo buuxda.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

Suxufiyiinta Ingiriiska iyo Ireland oo taagero weyn u muujiyay suxufiyiinta Soomaaliyeed
10/8/2012 5:37 PM EST
Isniin, October 08, 2012(HOL): Shirweynaha Suxufiyiinta dalalka Ingiriiska iyo Ireland oo lagu qabtay Newcastle ayaa markii ugu horreysay ka hadlay xaaladda dhibka badan ee ay ku shaqeeyaan suxufiyiinta Soomaaliyeed.

Madaxweynaha Soomaaliya oo si weyn loogu soo dhaweeyay Uganda
10/8/2012 11:54 AM EST
Isniin, October 08, 2012(HOL): Madaxweynaha Soomaaliya Xasan Shiikh Maxamuud oo maanta markii ugu horreysay dalka dibaddiisa safar ugu amba baxay ayaa waxaa si weyn loogu soo dhaweeyay garoonka diyaaradaha Entebbe ee magaalada Kampala ee dalka Uganda.

Dad aad u badan ka qaybgalay aas qaran oo Hargeysa loogu sameeyey meydka Abwaan Gaariye (SAWIRRO)
10/8/2012 11:08 AM EST
Isniin, October,08, 2012 (HOL)-Dhawr kun oo qof, ayaa maanta ka qaybgalay aaska Marxuum Maxamed Xaashi Dhamac Gaariye oo barqadii maanta la keenay magaaladda Hargeysa.

Shirkadda Hormuud oo ballan-qaaday bixinta Mushaaraadka Macallimiin wax ka dhiga Iskuul dadka Dhagaha la' ay wax ku bartaan
10/8/2012 9:48 AM EST
Isniin, Oktoobar 08, 2012 (HOL) — Shirkadda Isgaarsiinta Hormuud ayaa maanta ballanqaaday inay bixinayso mushaaraadka macallimiinta wax ka dhiga laba iskuul oo ay wax ka bartaan dadka dhegaha la'a oo Muqdisho ku yaalla kaddib kulan ay la yeelatay mas'uuliyiinta iyo qaar ka mid ah ardayda iskuulladaas wax ka barta.

Kooxdii ugu horaysay Somaliland ee dalbatay inay Qareenimo ku shaqeeyaan oo laga qaaday Imtixaan Tijaabo ah
10/8/2012 8:48 AM EST
Isniin, Oktoobar 08, 2012 (HOL) — Guddida ruqsad bixinta iyo anshax marinta Qareenadda ayaa sheegay natiijada imtixaan ay ka qaadeen kooxdii u horreysay ee qareenadda Somaliland.

Wafdi ka socda hay'adaha Samafalka ee Qaramada Midoobay oo Booqday Magaalada Baladweyne ee Gobolka Hiiraan
10/8/2012 8:22 AM EST
Isniin, Oktoobar 08, 2012 (HOL) — Wafdi ka socda hay’addaha samafalka QM ayaa maanta gaaray magaalada Baladweyne ee xarunta gobolka Hiiraan oo dhawaan ay ku dhuftay fatahaad uu sameeyay wabiga Shabeelle.

Dagaal culus oo Duleedka Baydhabo ku dhexmaray ciidamada Dowaldda Soomaaliya, kuwa Itoobiya iyo Xoogagga Al-shabaab
10/8/2012 6:55 AM EST
Isniin, Oktoobar 08, 2012 (HOL) — Ugu yaraan lix qof oo dhinacyadii dagaalamay ka tirsan ayaa ku dhintya dagaal culus oo deegaanka Goof-guduud ee duleedka Baydhabo ku dhexmaray ciidamada dowladda Soomaaliya, kuwa Itoobiya iyo xoogagga Al-shabaab.

Madaxweynaha Somalia iyo wafdi uu Hoggaaminayo oo u dhoofay dalka Uganda
10/8/2012 6:20 AM EST
Isniin, Oktoobar 08, 2012 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa maanta u dhoogay dalka Uganda, halkaas oo uu uga qaybgalayo munaasabad lagu xusayo 50-sano guuradii kasoo wareegtay markii Uganda ay xorriyadda qaadatay.

Xarakada Al-shabaab oo Deegaannada ay gacanta ku hayso ka mamnuucay Hay'adda gargaarka ee Islamic Relief
10/8/2012 5:57 AM EST
Isniin, Oktoobar 08, 2012 (HOL) — Xarakada Al-shabaab ayaa deegaannada ay ka taliso ka mamnuucday maanta oo Isniin ah hay'adda Islaamiga ah ee Islamic Relief oo fadhigeedu yahay magaalada London ee dalka Britain.

Maamulka Jaamacadda Kismaayo oo ka cabanaya Ciidamada Dowladda iyo AMISOM oo Saldhig ka sameystay Xarunta Jaamacadda
10/8/2012 5:45 AM EST
Isniin, Oktoobar 08, 2012 (HOL) — Maamulka Jaamacadda Kismaayo ayaa cabasho ka muujiyay ciidamada dowladda iyo kuwa AMISOM oo dhawaan saldhig ciidan ka sameystay xarunta jaamacadda Kismayo oo ku taal duleedka waqooyi ee magaalada.

Abaanduulaha Ciidamada Xoogga Somalia oo sheegay inay isku xirayaan Baladweyne, Muqdisho, Baydhabo iyo Kismaayo
10/8/2012 3:16 AM EST
Isniin, Oktoobar 08, 2012 (HOL) — Taliye ku xigeenka ciidamada milateriga Somalia, Jen. C/kariin Yuusuf Aadan (Dhega-badan) ayaa sheegay in qorshahoodu uu yahay mid ay ku doonayaan inay isugu furaan magaalada Muqdisho, degmada Baydhabo ee gobolka Bay, degmada Baladweyne ee gobolka Hiiraan iyo degmada Kismaayo ee gobolka Jubbada Hoose.