Sabti, March 17, 2012(HOL): Sheekh Fu’aad Max’ed Qalaf (Shongole) oo kamid ah saraakiisha sar sare ee Xarakada Al-shabaab oo ku sugan magaalada Kismaayo ayaa khudbad uu ka jeediyay masaajid ku yaal magaalada waxa uu uga hadlay arimo badan oo ku saabsan xaaladda uu dalka marayo.
Sheekh Fu’aad oo Muxaadaro ka jeediyay masaajidka Hareed Yarow oo ku yaal xaafadda Guulwade ee magaalada Kismaayo ayaa sheegay in ay guulo la taaban karo ka gaareen dagaallada ay kula jiraan wax uu ugu yeeray Ciidamada dowladda Ridada ah iyo kuwa Krishtaanka, isagoona sheegay inaysan marnaba joojin doonin dagaallada ilaa ay iyagu ka guuleysanayaan.
Sheekh Fu’aad ayaa ugu baaqay dadka ku dhaqan magaalada Kismaayo in ay ka qeybqaataan dagaallada ka dhanka ah ciidamada dowladda KMG iyo kuwa AMISOM ee ku sugan Soomaaliya.
Sidoo kale waxa uu sheegay in raga katirsan dowladda KMG ay ka furmaan haweenkooda, maadaama sida uu sheegay aysan ahayn dad Muslim ah, waxaana uu xusay in ay banaantahay hantida shaqsiyaadka katirsan dowladda KMG.
Hadalkan kasoo yeeray Sarkaalkan katirsan xarakada Al-shabaab ayaa kusoo beegmaya xilli inta badan gobollada Koonfureed ee Soomaaliya ay ka socdaan howgallo ballaaran oo ka dhan ah Al-shabaab, kuwaasoo ay iska kaashanayaan ciidamada dowladda KMG, Ahlusunna Waljameeca, AMISOM iyo weliba ciidamada Itoobiya.
Xasan Nuur, Hiiraan Online
hnur@hiiraan.com
Kismaayo, Soomaaliya