Arbaco, Maarso 14, 2012 (HOL) — Wararka aynu ka heleyno magaalada Baardheere ee gobolka Gedo ayaa sheegaya in dagaal xooggan uu xoogagga Al-shabaab iyo dad xoolaley ah ku dhexmaray deegaan lagu magacaabo Dhakaajo oo waxyar u jira degmada Baardheere ee gobolka Gedo.
Sida ay noo xaqiijiyeen ilowareedyo ku sugan Baardheere dagaalka ayaa ka dhashay kadib markii uu muran dhexmaray xoolaleyda iyo xoogagga Al-shabaab, kaasoo ka dhashay kadib markii sida la sheegay xoolaleyda ay diideen in ay bixiyaan Xoolo Zako ah oo ay Xarakada Al-shabaab dooneysay in ay ka qaado.
Ilo wareedyo ka madaxbanaan labada dhinac ayaa HOL u xaqiijiyay in dagaalka ay ku dhinteen shan kamid ah dhinacyadii dagaalamay, iyadoona ay weli taagantahay xiisada u dhexeysa xoolaleyda iyo dagaalyahanna Al-shabaab ee gobolka Gedo.
Col warfaa Sheekh Aadan oo ah afhayeenka ciidamada dowladda KMG ee Gobolka Gedo oo warbaahinta la hadlay ayaa sheegay in dagaalka ka dhacay duleedka Baardheere uu u dhexeeyay dad Xoolaley ah iyo Al-shabaab.
"Xoolaleyda ayaa ishortaag ku sameeyay Maleyshiyaad katirsan Al-shabaab oo doonayay in ay Xoolahooda xoog uga qaataan," ayuu Afhayeenku hadalkiisii ku daray. Illaa imika ma jiraan wax warar ah oo ku aadan dagaalkaasi oo kasoo baxay dhanka masuuliyiinta Al-shabaab ee gobolka Gedo.
Xiisadahani kasoo cusboonaaday duleedka Baardheere ayaa kusoo beegmaya xilli gobolka Gedo ay ka jiraan dhaqdhaqaaqyo dagaal oo aad u xooggan oo u dhexeeya xoogagga Al-shabaab iyo ciidamada dowladda KMG oo garabsanaya kuwa Ahlusunna iyo Militariga Kenya.
Xasan Nuur, Hiiraan Online
hnur@hiiraan.com
Kismaayo, Soomaaliya