3/28/2024
Today from Hiiraan Online:  _
Wararka Maanta- Sabti, Dec 8 , 2012
Dhallinyarada Muqdisho oo kulan Talo is-dhaafsi ah la yeeshay Guddoomiyaha Baarlamaanka Soomaaliya

Sabti, December 08, 2012 (HOL) — Xarunta golaha shacabka ee Muqdisho ayaa lagu qabtay kulan ay talooyin iyo su’aalo ay isku dhaafsanayeen guddoomiyaha baarlamaanka Soomaaliya, Maxemed Cismaan Jawaari iyo dhallinyarada magaalada Muqdisho. Kulankan oo ahaa kii ugu horreeyay noociisa oo ay yeeshaan madaxda dalka iyo dhallinyarada Muqdisho.

Kulankan ayaa waxaa soo qabanqaabiyay ururka dhallinyarada Soomaaliyeed ee SYL II; iyadoo fulintiisuna ay lahayd warbaahinta Qaranka, waxaana kulankan lagu weydiiyay su'aalo guddoomiyaha baarlamaanka, iyadoo dhallinyaraduna ay sidoo kale talooyin ka qaateen guddoomiyaha.

Dhalliyarada kulanka goobjoogga ka ahaa oo tiradoodu gaaraysay 300 oo ruux ayaa waxay sharraxeen qaabka ay jeclaan lahaayeen inay xukuumadda iyo baarlamaanku u shaqeeyaan. Iyadoo kulanka loogu duceeyay ardaydii Soonaaliyeed oo ku dhintay musiibooyinkii ka kala dhacay wakaaladdii hore ee hargaha iyo saamaha iyo hoteel Shaamoow; iyagoo Alle uga baryay inuu jannaadii ka waraabiyo.

Dhallinyaradii ka qaybgalay kulankaa ayaa waxay u mahad-celiyeen guddoomiyaha baarlamaanka iyagoo ka codsaday inaan marna laga hor-istaagin in fikaradahooda ay si toos ah ugu soo gudbiyaan madaxda Qaranka Soomaaliyeed.

Prof Jaawaari ayaa isaguna dhankiisa u ballanqaaday in baarlamaanku uu tix-galin doono shaqaaleynta dhallinyarada jaamacadaha ka baxay; maadaama ay marxalad adag wax kusoo barteen una dhabar adeygeen duruufihii adkaa ee uu dalku soo maray.

Guddoomiyaha baarlamaanka ayaa soo bandhigay shax uu ugu magac daray “Arday-Xildhibaan” taasoo uu ku sharraxay in looga danleeyahay in ardayda iyo baarlamaanka mar walba ay iska warqabaan. Waxaana shaxda uu ku sheegay inay tahay mid fududeyn doonta in ardaydu xili kasta talooyinkooda uu soo gudbin karo guddoonka baarlamaanka Soomaaliya iyo xildhibaannada.

Sidoo kale, Prof. Jawaari wuxuu ka dalbaday dhallinyarada Soomaaliyeed inay qortaan magacyada xildhibaannada ayna u soo gudbiyaan wixii talooyin iyo tusaale ah ee ay hayaan.

Ugu danbeyn, kulanka ujeeddadiisa ayaa waxay ahayd in bog cusub uu u furmo madaxda dowladda iyo qaybaha kala duwan ee bulshada Soomaaliyeed si ay wada-shaqeyn iyo isfaham u yeeshaan, talooyin iyo fakardana ay u wadaagaan. Iyadoo tani ay tahay tallaabo muujineysa isbadalka horumarineed ee dalka ka hirgalay; iyadoo dhallinyaradii kulankaas ka qaybgalay ay muujiyeen sida ay ugu faraxsan yihiin kulanka ay la yeesheen Prof. Jawaari.



Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
12/8/2012 9:52 AM EST
Sabti, December 08, 2012 (HOL) — Waxaa maanta qabuuraha Muslimiinta ee magaalada Nairobi lagu aasay qaar kamid ah dadkii ku dhintay qaraxii xalay ka dhacay masaajid ku yaal xaafadda Islii ee magaalada Nairobi.

12/8/2012 8:31 AM EST
Sabti, December 08, 2012 (HOL) — Xildhibaanno ka tirsan baarlamaanka Soomaaliya iyo koox fanaaniin ah ayaa maanta gaaray magaalada Baladweyne ee xarunta gobollka Hiiraan, halkaa oo ay ku soo dhaweeyeen mas’uuliyiinta ka tirsan maamulka gobolka.

12/8/2012 8:22 AM EST
Sabti, December 08, 2012 (HOL) — Guddiga doorashada Puntland ayaa saddex toddobaad oo dheeraad ah ku kordhiyay mudada furashada xisbiyada oo xiligii horay loogu qabtay uu dhammaad ku dhow yahay.

12/8/2012 7:35 AM EST
Axad, December 09, 2012 (HOL) — Guddiga Doorashooyinka Somaliland ayaa sheegay in dib loogu noqonayo tirintii sanaaduuqda degmadda Hargeysa ee natiijadeedu rabshaduhu ka dhasheen, isla markaana hakiyeen natiijadii ku meelgaadhka ahayd ee lagu dhowaaqay.

12/8/2012 7:24 AM EST
Sabti, December 08, 2012 (HOL) — Maxkamadda ciidamada qalabka sida ee Somalia ayaa xakun xabsi daa’in ah ku ridday maanta oo Sabti ah taliyihii hore ee ciidamada Asluubta Soomaaliyeed, Jen. Cabdi Maxamad Ismaaciil (Indho-buur) kaddib markii lagu eedeeyay inuu xabsiga dhexe kasii daayay 14 maxaabiis oo Al-shabaab ka tirsanaa.

12/8/2012 6:51 AM EST
Sabti, December 08, 2012 (HOL) — Madaxweynaha dowladda Soomaaliya, Xasan Sheekh Maxamuud oo maanta dib ugu soo laabtay Muqdisho ayaa cambaareeyay qaraxii xalay ka dhacay xaafadda Islii ee magaalada Nairobi oo uu ku dhaawamay xildhibaan Yuusuf Xasan oo ka tirsan baarlamaanka Kenya.

12/8/2012 6:30 AM EST
Sabti, December 08, 2012 (HOL) — Maamulka Ahlusunna Waljamaaca ee gobolka Galguduud ayaa ka manuucay xarunta gobolkaas ee Dhuusomareeb in hub lagu dhex qaato iyo si macno-darro ah rasaas loogu dhex-rido, iyagoo sheegay inay tallaabo ka qaadi doonaan ciddii jabisa amarkaas.

12/8/2012 3:10 AM EST
Sabti, December 08, 2012 (HOL) — Madaxweynaha Soomaaliya oo booqasho saddex maalmood qaadatay ku tagay dalka Turkiga ayaa sheegay in waxyaabihii ugu weynaa ee uu kala hadlay madaxda dalka Turkiga ay ugu muhiimsanaayeen sidii ammaanka dalka loo sugi lahaa.

12/8/2012 3:07 AM EST
Sabti, December 08, 2012 (HOL) - Shan qof ayaa ku dhimatay lix kalena waa ay ku dhaawacmeen qarax xalay lala eegtay Xildhibaan Yuusuf Xasan xilli uu dadweeyne kula hadlayay masaajid ku yaal wadada loo yaqaan Jam street oo ka tirsan xaafadda islii ee magaalada Nairobi.