Sabti, Abriil 07, 2012 (HOL) — Xildhibaannada afhayeenka baarlamaanka u doortay, xildhibaan Madoobe Nuunow Maxamed oo maanta kulan ku yeeshay Muqdisho ayaa sheegay in maanta la billaabayo qabashada araajida murashaxiinta u tarmaya xilka madaxweynimo ee Soomaaliya, iyagoo isla maanta soo gudbiyay shuruudaha looga baahan yahay mas'uulkan xilkan u tartamaya.
Afhayeenka guddigan doorashooyinka, Ismaaciil Maxamed Nuur ayaa wariyeyaasha ugu sheegay xarunta golaha shacabka in doorashada madaxweynimo ay dhacayso 30-ka bishan Abriil, isagoo intaa ku daray in baarlamaanka uu horay go'aan ugu gaaray in lasoo horumariyo doorashada madaxweynaha ee Soomaaliya.
"Waxaan halkan idin kugu soo gudbinaynaa jadwalkii guddiga doorashadu uu u soo sameeyay inay u dhacdo doorashada madaxweynaha, maadaama waqtiguna uu ciriiri nagu yahay. Guddiga doorashada wuxuu u qorsheeyay in murashaxiinta ay soo gudbin karaan codsiyadooda laga billaabo maanta oo ay taariikhdu tahay 07-Abriil, waxayna qabashada araajidu ku eg-tahay 21-ka bishan," ayuu yiri Ismaaciil Nuur.
Afhayeenku wuxuu sheegay in 22-ka illaa 25-ka bishan uu guddigu dib u eegis ku sameyn doono araajida murashaxiintu ay soo gudbiyeen, markaas kaddibna ay murashaxiinta guuleysta billaabi doonaan inay ajandayaashooda shaqo ka jeediyaan xarunta golaha shacabka.
"Shuruudaha murashaxa laga doonayo waa inuu yahay muwaadin Soomaali ah, muslim ah, 40-jir uusan ka yaraan, inuu caafimaad qabo oo aan horay dambi culus u gelin, inuu leeyahay qof akhlaaq wanaagsan, inuu leeyahay karti aqoon iyo waayo-aragnimo uu ku gudan karo waajibaadka madaxweynimo, inuu soo gudbiyo codsi, gal iyo laba sawir, isla markaana uu bixiyo lacagta diiwaangelinta oo ah 2,000 oo doollar," ayuu afhayeenka guddiga hadalkiisa ku daray.
Lama oga sida ay doorashadan ku dhici karto, iyadoo xildhibaannadan ay ka go'an tahay inay doortaan madaxweyne marka la gaaro bishan 30-keeda, waxaana fashil ku dhamaaday kulammo ay dhowr jeer la yeesheen madaxweynaha Soomaaliya.
Baarlamaanka Soomaaliya ayaa wuxuu u qaybsan yahay laba garab, iyadoo garab ka mid ah labadan garab uu taageersan yahay guddoomiyaha baarlamaanka, Shariif Xasan Sheekh Aadan halka garabka kalena uu kasoo horjeedo.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya