2014-10-23
Today from Hiiraan Online:  _
Wararka Maanta- Khamiis, Nov 29, 2012
Ra'iisul Wasaaraha Itoobiya oo sheegay in Ciidamadooda ay sii joogi doonaan Soomaaliya inta ay Awoodda uga Wareejinayaan AMISOM


Khamiis, November 29, 2012 (HOL) — Ra'iisul wasaaraha Itoobiya, Hailemariam Desalegn ayaa sheegay Arbacadii shalay in ciidamada Itoobiya ay sii joogi doonaan Soomaaliya inta ay goobaha ay hayaan kaga wareejinayaan ciidamada Midowga Afrika ka socda ee AMISOM.

Ciidamada Itoobiya ayaa waxay kaga sugan yihiin Soomaaliya deegaanno ku yaalla gobollada Hiiraan, Bay, Bakool iyo Gedo, iyagoo deegaannadaas ka saaray xoogaggii Al-shabaab ee muddada ka talinayay.

"Waxaanu sugaynaa inta ciidamada AMISOM aan kaga wareejinayno goobaha ay ku sugan yihiin ciidamadeenna, inta ay taasi ka suurogalaysana waan kusii sugnaan doonnaa goobahaas," ayuu wariyeyaasha u sheegay Hailemariam oo shir jaraa'id ay wada-qabteen madaxweynaha Soomaaliya, Xasan Sheekh Maxamuud.

Ma jiro xilli go'an oo uu sheegay ra'iisul wasaaraha Itoobiya in ciidamadiisa uu kaga saarayo Soomaaliya, isagoo sheegay in ciidamadiisa ay gacan siinayaan dowladda Soomaaliya si dib loogu soo celin lahaa ammaanka guud ee dalka dariska nala ah.

Sidoo kale, madaxweynaha Soomaaliya oo isaguna shirka jaraa'id ka hadlay ayaa sheegay in Al-shabaab lagu jabiyay deegaanno badan oo Soomaaliya ka tirsan, ayna hadda ku harsan yihiin deegaanno yar, wuxuuna dagaalyahannada ajnabiga ah ee ka barbar-dagaalamaya Al-shabaab ku boorriyay inay isaga baxaan dalka.

"Ma jiro wax xiriir ah oo naga dhexeeya innaga iyo ajaanibta ka barbar dagaalamaya Al-shabaab," ayuu yiri Xasan Sheekh oo intaas ku daray: "Waxaa u furan oo keliya inay dalka isaga baxaan."

Ciidamada Midowga Afrika oo tiradoodu gaarayso 17,000 oo askari ayaa waxay isku dayayaan inay isku xiraan deegaannada ay Al-shabaab ka qabsadeen iyo kuwa ay Itoobiya gacanta ku hayso ee Bartamaha iyo Koonfurta Soomaaliy ku yaalla.

Itoobiya ciidamadeeda ku sugan Soomaaliya qayb kama ahan howgalka AMISOM ee Soomaaliya, balse waxay sheegeen inay gacan ka geysanayaan sidii Al-shabaab oo ah awood dagaal kula jirta dowladda iyo AMISOM looga saari lahaa dalka oo dhan.

Booqashada madaxweynaha Soomaaliya, Xasan Sheekh uu ku tagay magaalada Addis Ababa ee xarunta dalka Itoobiya ayaa noqonaysa tii ugu horreysay oo uu dalkaas ku tago tan iyo markii xilka madaxweynimo ee Soomaaliya loo doortay.

Dhanka kale, booqashadan waxay noqnaysaa tii ugu saddexaad oo uu ku tago dalka Afrikaan ah tan iyo markii xilka madaxweynimo loo doortay, iyadoo la xusuusto inuu ra'iisul wasaaraha Itoobiya ahaa mas'uulkii ka socday Afrika ee kasoo qaybgalay caleemo-saarkii madaxweyne Xasan Sheekh.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

2012-11-29 8:44 AM EST
Khamiis, November 29, 2012 (HOL) — Munaasabad maanta loo qabtay 650-arday oo ka qalin-jabinayay jaamacada SIMAD ayaa lagu qabtay hoteelka City Palace ee magaalada Muqdisho kuwaasoo isugu jiray wiilal iyo gabadho da'yar, waxaana munaasabadda ka qayb-galay maamulka sare ee jaamacada, macallimiinta, ardayda, waalidiin iyo dadweyne kale oo lagu casuumay.

2012-11-29 7:58 AM EST
Khamiis, November 29, 2012 (HOL) — Saraakiil ka tirsan Ahlusunna oo maanta shir jaraa'id ku qabtay Muqdisho ayaa sheegay in ciidamada Ahlusunna si rasmi ah loogu wareejinayo dowladda Soomaaliya, iyagoo xusay in dagaalkii ay soo galeen uusan ahayn mid ay ku doonayaan inay noqdaan urur gooni-u-goosad ah.

2012-11-29 7:35 AM EST
Khamiis, November 29, 2012 (HOL) — Kulan golaha wasiirrada Soomaaliya ay ku yeesheen maanta xaruntooda Muqdisho ayay kasoo saareen qodobbo ay ka mid yihiin in la adkeeyo ammaanka caasimadda Soomaaliya, sidoo kalena dowladdu ay is le'ekeyso dhaqaalaha kasoo xarooda dekedda iyo gasroonka diyaaradaha Muqdisho.

2012-11-29 6:06 AM EST
Khamiis, November 29, 2012 (HOL) — Askari ka tirsan ciidamada dowladda Somalia ayaa haweeney rakaab ahayd dilay, saddex qof oo kale ku dhaawacay rasaas uu si bareer ah ugu furay gaari kuwa dadweynaha ah oo marayay agagaarka tarabuunka Muqdisho.

2012-11-29 5:51 AM EST
Khamiis, November 29, 2012 (HOL) — Iskahorimaad u dhexeeya ciidamada AMISOM iyo xoogagga Al-shabaab ayaa maanta ka dhacay deegaanno ka tirsan gobolka Shabeellada hoose, iyadoo sidoo kale nin bam ku hubeysan uu qarax ku weeraray ciidammo ka tirsan kuwa AMISOM oo ku sugan degmada Marko.

2012-11-29 5:44 AM EST
Khamiis, November 29, 2012 (HOL) — Ugu yaraan lix qof oo labada dhinac ah ayaa ku dhintay toban kalena way ku dhaawacmeen dagaal Arbacadii shalay deegaanka Xudun ee gobolka Sool ku dhexmaray ciidamada Somaliland iyo ciidamada Khaatumo oo diidanaa in doorasho ay halkaas ka dhacdo.

2012-11-29 4:15 AM EST
Khamiis, November, 29, 2012 (HOL) – Maalintii shalay waxaa booqasho ku tagay magaalada Baladweyne ee xarunta gobollka Hiiraan wafdi ka socday xukuumada Soomaaliya oo sidoo kalana ay ka mid ahaayeen xildhibaanno ka tirsan baarlamaanka.