Ciidamada Ammaanka Somaliland oo soo qabtay raashin mucaawino ah oo la musuqmaasuqay
Talaado, Maarso 13, 2012 (HOL)- Raashinkii mucaawimadda ahaa ee la leexsaday ayaa qaybo ka mid ah laga soo ururiyey Bakhaaro ku yaalla magaaladda Hargeysa, halka qaarkoodna laga soo qabtay xuduudda Somaliland gaar ahaan Magaaladda Lawyo-caddo.
Ilaa afar gaadiidka waaweyn iyo laba gaadhi oo kuwa Ciidamadda ah ayaa lagu soo guray Raashinkan, waxaana lagaga dajiyey rarkii saarnaa baakharadda Wasaaradda Dib u dejinta ee magaaladda Hargeysa.
Raashin la sheegayo in la leexsaday ee masuuliyiinta qaarna lagu eedeynayo ayaa lagu sheegay inay buux dhaafiyeen bakhaaradda magaaladda Hargeysa, halkaas oo sifo sharci daro ah lagu soo duwaday.
Sida ay noo sheegeen ciidamadii soo qabtey ee ilaaladda ka ahaa Raashinkan ayaa sheegay in laga soo qabtay qaar kamid ah gaadiidkan magaaladda Lawyo caddo, oo la doonayey in xuduudaha lagu iibiyo, qaar kalana bakhaaro ku yaalla magaaladda Hargeysa laga soo guray, waxaana ilaalinayey ciidamo badan iyadoo laga soo gurayey baakharo waaweyn oo ay leedahay wasaaradda Dib u dajinta Somaliland.
Wasiirka Dib u dajinta oo aanu doonaynay in aanu arrintan wax ka waydiino ayaanay noo suurtogalin kaddib markii uu shirar isdaba joogga ku lahaa xafiiskiisa, isagoo arrimahan Raashinka ah ku mashquulsanaa. Raashin mucaawimada ah ayaa ahayd raashin deeqa tii ugu wanaagsanayd ee la bixiyo, waxaana bixiyey dawladda Cumaan, iyadoo ugu tallogashay qoysaska danyarta ah, haseyeeshee taasi waxay keentay inay hunguriyaan madax sarsare oo ka tirsan xukuumadda Somaliland.
Raashinkan ayaa ka koobnaa cuntooyinka Qaaliga ah sida Bariiska nooca qaaliga ah, Caanaha Caruurta, sharaab iyo agabka guryaha la dhigto oo ay ku jiraan weelal loogu tallogalay dadka danyarta ah ee ku nool Somaliland.
Arrintan ayaa waxa u xidhan ilaa saddex masuul oo kiiskoodda la baadhayo, isla markaana xilalkii ay hayeenna laga qaaday, halka kuwa kalana lagu dabo jiro.
Barkhad-Ladiif M. Cumar, Hiiraan Online
[email protected]
Hargeysa, Somaliland
