2014-08-22
Today from Hiiraan Online:  _
Wararka Maanta- Talaado, Dec 4 , 2012
Ra'iisul Wasaaraha Soomaaliya oo sheegay in Gobollada Dhexe iyo Magaalada Kismaayo uu u kala dirayo Laba Wafdi


Talaado, December 04, 2012 (HOL) — Ra'iisul wasaaraha Soomaaliya, Cabdi Faarax Shir-doon (Saacid) oo warbaahinta la hadlay ayaa sheegay in wafdiyo heer wasiir ah ay xukuumaddiisu u dirayso gobollada dhexe iyo magaalada Kismaayo oo uu weli ka taagan yahay muran dhinaca maamulka ah.

Mudane Saacid ayaa sheegay in wafdi ka kooban illaa saddex wasiir uu u diri doono gobollada dhexe ee Soomaaliya si ay u soo qiimeeyaan baahida ka jirta gobolladaas, si ay dowladdu wax uga qabato baahida ammaan iyo midda horumarineed ee ka jirta gobolladaas.

"Gobollada dhexe waxaan u diri doonnaa wafdi ballaaran oo ka kooban ugu yaraan saddex wasiir iyo in ka badan oo talo naga soo siiya sidii wax looga qaban lahaa kuwa khatarta ku ah nabadda iyo maamul u sameynta gobolladaas iyo weliba qorshaha horumarinta gobolladaas," ayuu yiri ra'iisul wasaare Saacid.

Sidoo kale, ra'iisul wasaaruhu wuxuu ammaanay ururka Ahlusunna oo uu sheegay in iyagoo aan kaalmo ka helin dowladda ay iska difaaceen Al-shabaab, isagoo sidoo kale ku ammaanay inay go'aansadeen inay ka mid noqdaan biiraan dowladda.

Ra'iisul wasaaruhu ayaa dhanka kale sheegay in xukuumaddiisa ay wafdi sare u diri doono magaalada Kismaayo ee gobolka Jubbada hoose si ay uga shaqeeyaan sidii maamul loogu sameyn lahaa gobollada Jubbooyinka.

"Waxaan ammaanayaa sida ay dadka ku nool Kismaayo xil isaga saareen sidii ay ku sugi lahaayeen ammaanka magaladooda ayna uga hortageen gaadiid waxyaabaha qarxa laga soo buuxiyay, waxaana u diri doonnaa wafdi heer sare ah," ayuu Saacid yiri oo intaas ku daray in qorshaha dowladda ee Kismaayo uu yahay sidii maamul wanaagsan looga hirgelin lahaa," ayuu yiri ra'iisul wasaare Saacid.

Ugu dambeyn, ra'iisul wasaaraha Soomaaliya wuxuu sheegay in madaxweyaha Soomaaliya Xasan Sheekh uu 12-ka bishan ku tegi doono dalka Kenya safar la xiriira maamul u sameynta Jubbooyinka.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

2012-12-04 11:46 AM EST
Talaado, December 04, 2012 (HOL)- Garoonka diyaaradaha ee magaalada Boosaaso waxaa maanta laga soo dejiyey 5 maxbuus oo in muddo ah ku jirey xabsi ku yaalla Seychelles, kadib markii ay maxkamadi ku riddey xukunno kala duwan oo la xiriira falal Burcad-badeednimo oo ay ku lug lahaayeen.

2012-12-04 8:43 AM EST
Talaado, December 04, 2012 (HOL) — Sarkaal u hadlay Qaramada Midoobay ayaa sheegay maanta oo Salaaso ah in xaaladda bani'aadamnimo ee Soomaaliya ay weli tahay mid khatar ah, balse ay jiraan rajooyin ka dhalanaya isbedel siyaasadeed iyo midka ammaan ee dalka ka hirgalay.

2012-12-04 8:36 AM EST
Talaado, December 04, 2012 (HOL) — Kooxda Xuquuqda aadamaha ee Midawga Yurub, Norway, Switzerland iyo Maraykanka ayaa ku baaqay in wax laga qabto meel ka dhacyada ka dhanka ah saxaafadda iyo weliba xad-gudubyada ku dhisan jinsiga.

2012-12-04 7:21 AM EST
Talaado, December 04, 2012 (HOL) — Taliyaha ciidamada ilaalada waddooyinka, Jen. Cali Xirsi Barre (Cali-gaab) ayaa ka hadlay dhaawac fudud oo uu u geystay askari la sheegay inay isbaaro u taallay jidka 21-Oktoobar ee degmada Waabeir ee Magaalada Muqdisho.

2012-12-04 6:56 AM EST
Talaado, December 04, 2012 (HOL) — Maxaabiis budhcad badeed ah oo lagu soo maxkamadeeyey dalka Seychelles ayaa shalay lagu soo wareejiyey gacanta Somaliland.

2012-12-04 5:42 AM EST
Talaado, December 04, 2012 (HOL) —Kooxo ku hubeysan baastoolado ayaa shalay gelinkii danbe toogasho ku dilay Sheekh siweyn looga yaqaanay magaalada Baardheere xilli uu kusii jeeday masaajid.

2012-12-04 3:19 AM EST
Talaado, December 04, 2012 (HOL) — AMISOM ayaa sheegtay inay qaadayso tallaabo lagu adkeynayo ammaanka jidka isku xirta magaalada Marko ee xarunta gobolka Shabeellada Hoose iyo deegaanka Lambar 50 ee isla gobolka Shabeellada hoose, kaddib laba weerar lagu qaaday gaadiid kolonyo ah oo waday wasiirro ka tirsan xukuumadda Soomaaliya oo ka dhacay waddadaas.

2012-12-04 2:42 AM EST
Talaado, December 04, 2012 (HOL) — Ugu yaraan sideed askari oo ka tirsanaa ciidamadii dagaalamay ayaa ku dhintay tiro kalena way ku dhaawacmeen dagaal culus oo ciidamada dowladda Soomaaliya iyo xoogagga Al-shabaab ku dhexmaray deegaanka Garsaale oo ku dhow degmada Jowhar ee xarunta gobolka Shabeellada Dhexe.

2012-12-04 2:25 AM EST
Talaado, December 04, 2012 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo afar wasiir ay ku jiraan ayaa maanta u dhoofay dalka Turkiga, waxaana wafdigan sii sagootiyay guddoomiyaha baarlamaanka Soomaaliya, Prof. Maxamed Cismaan Jawaari.