2014-11-21
Today from Hiiraan Online:  _
Wararka Maanta- Axad, Dec 30, 2012
Wasiirka Amniga Puntland oo ka digay in Hoteellada lagu qabto shirar looga soo horjeedo Ammaanka Puntland


Axad, December 30, 2012 (HOL) — Kulan ballaaran oo ay isugu yimaadeen qaybaha kala duwan ee bulshada iyo maamulka gobolka Bari, islamarkaana uu kasoo qayb galay wasiirka amniga Puntland, ayaa maanta ka dhacay xarunta dowladda hoose ee degmada Boosaaso.

Wasiirka amniga Puntland Col. Khaliif Ciise Mudan oo khudbad dheer goobta ka jeediyey ayaa ka hadlay arrimo badan oo khuseeya ammaanka Puntland iyo weliba hirgelinta axsaabta.

Ugu horreyn wuxuu sheegay inay lagama maarmaan tahay in ammaanka sugiddiisa laga wada shaqeeyo, wuxuuna dad-weynaha magaalada Boosaaso ku amaanay inay yihiin dad si fiican laamaha ammaanka ula shaqeeya.

"Amnigu waa nolol, haddii uusan amni jirin nabad looma seexdeen, hadii aan shacabku nala shaqeynna waxba nooma qabsoomeen, dadka amniga khatarta ku ah yaan lasoo dhoweysan" Col. Khaliif ayaa yiri.

Dhinaca kale, wasiirka ayaa xusay inay jiraan dad uu ku tilmaamay fidmo-wadayaal aan bulshada metelin oo ku howlan carqaladeynta hir-gelitaanka nidaamka axsaabta. "Ayaamahan waxaa jira dad meelahaas tegaya oo leh dadkaan metelnaa, maaha dadkaasi dad la dirsaday, waxay wadaan waa dhib! hadii aysan ka joogin, waxaan leenahay ka daaya, hadii ay ka deyn waayaan sharcigaa la marsiinayaa."

Ugu daynbeyntii wuxuu maamuleyaasha Hoteelada ugu baaqay in aysan ogolaan in Hoteeladooda lagu qabto shirar aan munaasib ahayn waa sida uu hadalka u dhigaye.

"Hoteelada shir aan sharci ahayn waa inaan lagu qaban, shir lagu duminaayo qarankeena waa inaan lagu qaban, ciddii ku qabatana sharci-darro ayay sameynaysaa, waana lagula xisaabtamayaa".

Hadalka wasiirka ayaa kusoo aadaya xilli todobaadyadii u danbeeyey ay ciidamada Boolisku hor joogsadeen kulamo ay qaybo mucaaridka ka tirsani ku yeelan lahaayeen magaalooyinka Garoowe iyo Boosaaso.

Maxamed Salaad Xaaji Dirir, Hiiraan Online
xaajidirir@hiiraan.com  
Puntland, Soomaaliya





Post your comments

2012-12-30 11:30 AM EST
Axad, December 30, 2012 (HOL) — Maxkamadda derejada 1-aad ee gobolka Bari - laanteeda magaalada Boosaaso- ayaa maanta xukuno kala duwan ku riddey eedaysaneyaal ay tiradoodu 17 qof gaareyso, kadib markii lagu helay ku lug lahaanshaha falal Burcad-badeednimo.

2012-12-30 6:59 AM EST
Axad, December 30, 2012 (HOL) — Mudaharaad balaadhan ayaa maanta ka dhacay magaalada Boorame ee gobolka Awdal, kaasoo lagu diidan yahay sababta illaa hadda loo dhaarin laayahay maayarkii iyo ku xigeenkii degmadda Saylac oo khilaaf ka taagan yahay.

2012-12-30 6:56 AM EST
Axad, December 30, 2012 (HOL) — Guddoomiyaha maamulka gobolka Hiiraan, Cabdifataax Xasan Afrax ayaa maanta kulan ballaaran kula qaatay gudaha isbitaalka magaalada Baladweyne qeybaha bulshada iyo guud ahaa shaqaallaha isbitaalka, kadib markii ay joojisay hay’adda MSF gacantii ay sii jirtay isbitaalka guud ee Baladweyne.

2012-12-30 6:44 AM EST
Axad, December 30, 2012 (HOL) — Maamulka Puntland ayaa laba maado oo cusub kusoo kordhiyay waxbarashada dugsiyada ku yaalla deegaannada uu maamulkaas ka taliyo, waxaana labadan maaddo ay kala yihiin maaddo lagu baranayo nabadda iyo mid lagu baranayo dimuqraadiyadda.

2012-12-30 6:06 AM EST
Axad, December 30, 2012 (HOL) — Xidlhibannada baarlamaanka Soomaaliya ayaa maanta cod aqlabiyad ah ku ansixiyay miisaaniyadda ay xukuumaddu ku shaqeyn doonto sannadka soo socda ee 2013, kaddib markii wax ka bedel lagu soo sameeyay qodobbadii ay mudanayaashu doodda adag ka yeesheen kuna diideen isla todobaadkan miisaaniyada.

2012-12-30 5:43 AM EST
Axad, December 30, 2012 (HOL) — Madaxweynaha Puntland Dr. Cabdiraxmaan Maxamed (Faroole) oo khudbad ka jeediyey xaflad lagu soo xirayey olole caafimaad oo lagu qabtay Isbitaalka weyn ee magaalada Boosaaso ayaa ka hadlay arimo badan.

2012-12-30 1:02 AM EST
Axad, December 30, 2012 (HOL) — Iyadoo shalay ay ku dhinteen dalka Liibiya 16-qof oo tahriibayaal Soomaali ah ayaa waxaa lasoo bandhigay magacyada maydadkii dadkaas, iyadoo xaaladda saddex ka mid ah kuwii dhaawacmayna aad looga dayrinayo.

2012-12-30 1:00 AM EST
Axad, December 30, 2012 (HOL) — Garoonka diyaaradaha ee Muqdisho ayaa ah mid aad u mashquul badan dhowrkii maalmood ee lasoo dhaafay iyadoo halkaas ay kasoo degaan maalin walba in ka badan 100 qof oo kasoo ambabaxay magaalada Nairobi ee xarunta dalka Kenya.