2014-11-27
Today from Hiiraan Online:  _
Wararka Maanta- Isniin, Dec 3 , 2012
Baarlamaanka Soomaaliya oo u yeeray laba Wasiir oo ka tirsan Xukuumadda Soomaaliya si su'aalo loo weydiiyo



Isniin, December 03, 2012 (HOL) — Xildhibaannada Baarlamaanka Soomaaliya ayaa u yeeray wasiirka gaashaandhigga, C/xakiin Maxamuud Xaaji Fiqi iyo wasiirradda arrimaha dibadda iyo iskaashiga caalamiga ah, Fowziyo Yuusuf Xaaji Aadan si ay u weydiiyaan su'aalo ku saabsan Xarigga wariyihiin BBC-da iyo kireyntii safaaradda Soomaaliya ee Talyaaniga.

Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) ayaa sheegay in labada wasiir looga baahan yahay inay illaa lixda bishan ay ku yimaadaan baarlamaanka hortiisa si su'aalo loo weydiiyay.

Xidhibaanada baarlamaanka ayaa waxay horay ugu yeeray labadan xubnood, iyadoo xilligii loo qabtay uu ku ekaa shalay oo Axad ahayd, waxaana maanta mar kale loo sameeyay muddo kordhin uu ugu yeerayo baarlamaanka.

Wasiirka Gaashaandhigga C/xakiin Max'uud Xaaji Fiqi ayaa sida aan xog hoose ku heleyno waxaa wax laga weeydiin doonaa wariyihii BBC-da oo todobo maalmood u xirnaa maxkamadda ciidamada, su'aasha la weydinayana waxay tahay maadaama wariyuhu uusan ciidan ahayn sababta xukun la'an uu todobo maalmood u xirnaa.

Wariye  Ibraahim Max'ed Aadan ayaa maalin ka hor laga sii daayay xabsiga,, kadib dadaal ay sameeyeen wafdi ka socday idaacadda  BBC-da oo Muqdisho gaaray.

Wasiiradda arimaha dibadda ayaa la filayaa in wax laga weeydiiyo sababta loo kireeyay safaaradda Soomaaliya ee Talyaaniga iyo in ay wax ka ogtahay wasaaradda arimaha dibadda, hadii aysan wax ka ogeyna sababta ay uga hadli weyday wasiiradda arimaha dibadda arinta kireynta.

Guddoonka baarlamaanka Soomaaliya ayaa horay u sheegay inay la xisaabtami doonaan xukuumadda cusub, iyadoo labadan wasiir ay noqonayaan kuwii ugu horreeyay ee baarlamaanka looga yeero tan iyo markii la ansixiyay golaha wasiirrada bartamihii bishii hore.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2012-12-03 1:51 PM EST
Isniin, December 03, 2012(HOL): Safaaradda Soomaalida ee Shiinaha iyo dhammaan Ganacsatada iyo ardeyda soomaaliyeed ee ku nool dalka China ayaa si wada jir ah, tacsi ugu dirayo Ehelladii iyo asxaabtii uu ka geeriyooday marxuumka.

2012-12-03 1:29 PM EST
Isniin, December 03, 2012 (HOL) —Kulan ay maanta isugu yimaadeen golaha wasiiradda xukuumadda federaalka Soomaaliya ayay uga doodeen arimo dhowr ah oo ay kamid tahay miinaasiyadda sanadda 2013.

2012-12-03 12:52 PM EST
Isniin, December 03, 2012 (HOL) —Ururka shaqaalaha aduunka ee (ILO) ayaa maanta tababar usoo xiray xubno katirsan maamulka gobolka banaadir.

2012-12-03 8:14 AM EST
Isniin, December 03, 2012 (HOL) — Goobjoogayaashii Caalamiga ahaa ee u kuurgaliyey qaabka doorashooyinka golaha deegaanku uga dhaceen Somaliland ayaa sheegay inay si nabadgalyo ah uga dhacday doorashaddu Somaliland, isla markaana dadku si weyn ugu soo baxeen codeynta, taas oo keentay inay ka bataan dadkii doorashooyinkii hore codeen jiray,kuwaas oo dadweynaha somaliland ku tilmaamay qaar u bislaaday dimuqraadiyada iyo usoo bixitaanka doorashooyinka.

2012-12-03 7:46 AM EST
Isniin, December 03, 2012 (HOL) — Roobab xooggan oo Sabtidii lasoo dhaafay ka da'ay magaalada Muqdisho ayaa burburiyay guryo ka sameysan cooshado oo ay ku noolaayeen barakacayaal deegaannadoodii uga soo tagay dagaallo iyo abaaro ku dhuftay sannadkii hore.

2012-12-03 7:27 AM EST
Isniin, December 03, 2012 (HOL) — Dibadbax lagu taageerayay amarkii isbaarada lagu qaadayay ee uu dhawaan bixiyay madaxweynaha Soomaaliya, Xasan Sheekh Maxamuud ayaa maanta ka dhacay garoonka Koonis Istaadiyum ee magaalada Muqdisho.

2012-12-03 6:56 AM EST
Isniin, December 03, 2012 (HOL) — Wafdi isugu jiray wasiirro iyo saraakiil ciidan oo uu hoggaaminayay wqasiirka arrimaha gudaha iyo ammaanka Qaranka, C/kariin Xuseen Guuleed ayaa ayaa lagu weeraray maanta duleedka degmada Marko ee xarunta gobolka Shabeellada Hoose, iyagoo kusoo jeeday Muqdisho, kaddib markii ay soo gabagabeeyeen safar ay ku joogeen degmada Marko.

2012-12-03 6:26 AM EST
Isniin, December 03, 2012 (HOL) — Xildhibaannada baarlamaanka Soomaaliya ayaa maanta cod aqlabiyad ah ku ansixiyay xeer hoosaasyada uu baarlamaanka Soomaaliya ku shaqeyn doono afarta sano ee soo socota, iyadoo aanay jirin cid kasoo horjeesatay iyo cid ka aamustay.

2012-12-03 3:17 AM EST
Isniin, December 03, 2012 (HOL) — Ugu yaraan shan ka mid ah dhinacyadii dagaalku u dhexeeyay ayaa ku dhintay dagaal culus oo shalay gallinkiii dambe ku dhexmarya duleedka degmada Bardaale ee gobolka Bay ciidamada dowladda Soomaaliya iyo xoogagga Al-shabaab.

2012-12-03 3:09 AM EST
Isniin, December 03, 2012 (HOL) — Danjiraha Jabuuti u jooga Soomaaliya, Dayib Dubad Rooble ayaa shaaca ka qaaday in ciidamada ka socda dalka Jabuuti ee qaybta ka ah howlgalka AMISOM ee Soomaaliya lasoo dhameystiri doono toddobaadka soo socda.

2012-12-03 2:53 AM EST
Isniin, December 03, 2012 (HOL) — Wasiirka arrimaha gudaha iyo Amniga Qaranka ee xukuumadda Soomaaliyeed, Cabdikariin Xuseen Guuleed ayaa sheegay in degmada Marko iyo deegannada kale ee gobolka Shabeellada hoose ay kaga sugan tahay dowladda Soomaaliya la geyn doono ciidammo suga ammaanka oo isugu jira booliis iyo nabad-sugid.

2012-12-03 2:26 AM EST
Isniin, December 03, 2012 (HOL) — Maxaabiis ku jirtay xabsiga degmada Baydhabo oo looga shakisnaa inay ka tirsan yihiin Al-shababa ayaa ka baxsay xalay xabsiga degmada Baydhabo ee xarunta gobolka Bay, iyadoo mas'uuliyiinta gobolkaas ay u sheegeen warbaahinta inay socdaan baaritaanno ku aaddan qaabkii ay maxaabiistu ku baxsatay.

2012-12-03 2:15 AM EST
Isniin, December 03, 2012 (HOL) — Xildhibaannada baarlamaanka Soomaaliya ayaa lagu wadaa inay maanta codka u qaadaan xeer hoosaadyada ay ku shaqeynayaan muddada uu baarlamaankan jiray oo afar sano ah, iyadoo horay ay mudanayaashu uga doodeen xeerkan.