SHEEKH SHARIIF: "Shacabka Muqdisho waa inay u diyaargaroobaan sidii doorasho loogu qaban lahaa Muqdisho"
Isniin, Abriil 09, 2012 (HOL) — Madaxweynaha Soomaaliya, Sheekh Shariif Sheekh Axmed oo ka hadlayay munaasabad magaca looga badalayay degmada Wardhiigley ee gobolka Banaadir looguna bixinayay magaca cusub ee Warta Nabadda ayaa sheegay in Muqdisho lagu qabanayo doorashada madaxda Soomaaliya kaddib muddo 42-sano ah.
Madaxweyne Shariif wuxuu sheegay in shirka looga gudbayo marxaladda KMG ah ee ay dowladda hadda ku shaqeyso lagu qaban doono Muqdisho, laguna dooran doono madaxda dalka.
"Sida aad la socotaan waxaa lagu jiraa qorshe looga gudbiyo xilliga kala guurka ah looguna gudbayo dowlad joogto ah, waayo sideed sano ayaan kusoo jirnay xilliga KMG ah. Waxaana doonaynaa in Muqdisho ay 42-sano kaddib ka dhacdo doorasho lagu soo dooranayo madaxda dowladda," ayuu yiri Sheekh Shariif.
Madaxweynuhu wuxuu ku boorriyay shacbka Muqdisho inay ka shaqeeyaan sidii ay bilicda magaalada u soo celin lahaayeen, guryaha jajabanna ay dib ugu dhisi lahaayeen, si ay cfaasimaddu ugu ekaato caasimad lagu qaban karo doorasho.
"Waxaa la idinkaga baahan yahay inaad u diyaar-garowdaan dadka soo socda waayo Soomaali oo dhan ayaa isugu imaanaysa, mana doonayno inaad guryo dad ku jirtaa... waan in la banneeyo guryaha dadka," ayuu yiri Sheekh Shariif.
Sidoo kale, madaxweynuhu wuxuu ku baaqay in qabyaaladda laga fogaado ayna ka fogaadaan dadka caasimadda deggen qabiileysiga, isagoo sheegay in caasimaddu ay tahay magaalo ka dhexeysa Soomaalida oo dhan.
Ugu dambeyn, wuxuu hay'adaha ammaanka ku wargeliyay inay xoog uga saaraan dadka ku jira guryaha dadka ee diida inay ka baxaan, isagoo shacabka ugu baaqay in qofkii guri uusan lahayn ku jira uu isaga baxo, maadaama ay tahay in guri aan la lahayn lagu jiro doqonnimo.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya
