Khamiis, 25 March 2010 (HOL)- Guddoomiyaha Xisbiga Mucaaradka ah ee KULMIYE Axmed Maxamed Maxamuud (Siilaanyo), ayaa ka digay dib-u-dhac mar kale ku yimaadda Doorashada Madaxtooyada Somaliland, waxaanu Xukuumadda Madaxweyne Rayaale ku dhaliilay wax-qabad-la’aan.
Guddoomiyaha Xisbiga KULMIYE oo maanta meel munaasibad ah kala hadlayay qaar ka mid ah taageerayaashiisa, ayaa hadalkiisa ku bilaabay oo yidhi, “Waa ta maanta Cusbatalkii Hargeysa ee aynu ogayn waqtigii Dhalinyarta Hargeysa u gurman jireen ee dadku ay dhisi jireen ee halgankii SNM uu ka bilaabmay, waynu ognahay oo waa taa oo markii Madaxtooyadii ka soo horjeedday Cusbatalku ay wax u qaban wayday, guddidii, shacabkii iyo dadkii is-xil qaamay ee dibedda wax uga doontay ee dhaqaalaha dibedda uga soo ururisay ee maamulka wanaagsan u samaysay, waa ta Dawladdii maanta ka takhalustay ee Dhaqaatiirtii caanka ahaa ee dalka iyo umadda wax u qabanayay, waa kuwaa yidhi Shaqadii waanu idinka fadhiisinay, waxna laydiinkama baahna. Kuwa aynu isku hallaynaynaa ee umaddu wax ka sugaysaa waa kuwaa.”
Guddoomiyaha Xisbiga KULMIYE wuxuu sheegay in dadweynuhu ay inta ugu badan waydiiyaan waqtiga ay Doorashadu dhacayso, isla markaana wuxuu xusay in kaliya la sugayo in Guddida Doorashadu shaaciso waqtiga Doorashada la qabanayo. “Haddii Daahir Rayaale Kaahin iyo maamulkiisu ku kalsoon yihiin inay cod wax ku helayaan oo dadku taageero u hayaan, waxay maraysaa 7 sanno iyo badh inta Doorashadii la qaban waayay, waynu ognahay oo Dunida oo dhan baa isugu keen timi. Maanta Telefoonada ugu badan ee dibedda ka yimaadda waxaanu ka haynaa dadka Doorashadii ma dhacaysaa, goorma ayayse dhacaysaa? Anagu inta kaliya ee aanu dadka u sheegno iyo kalsoonida aanu ku abuurnaa waxa weeye, Doorashadii way dhacaysaa oo waqtigeedii ayay dhacaysaa, Dawladdana gacanta uguma jirto. Waxaanu leenahay oo aanu uga digaynaa Dawladda in aanay wax dambe oo musuq-maasuq ah oo dhibaato ah oo luggooyo ah ula iman geeddi-socodkaa Dimuqraadiyadda iyo Doorashooyinka. Waxaynu maanta ku talo-galaynaa oo aynu sugaynaa oo dhegteenu u taagan tahay waa Guddida Doorashada oo inoo sheegta oo ku dhawaaqda maalinta ay Doorashadu dhici lahayd.” Ayuu yidhi Guddoomiyaha Xisbiga Mucaaradka ah ee KULMIYE.
Waxa kale oo uu Guddoomiyaha KULMIYE ka warbixiyay nuxurka socdaallo ay Weftiyo ka kala socda Xukuumadda, Shirguddoonnada Baarlamaanka iyo Axsaabta siyaasadda Somaliland ku joogaan dalalka Jabuuti iyo Maraykanka, halkaas oo ay kulamo kula leeyihiin qaar ka mid ah madaxda iyo masuuliyiinta Dawladda Maraykanka. “Waa tii Axsaabta loogu yeedhay Jabuuti iyo Weftiga jooga Maraykanka, waxa kaliya ee ay Deeq-bixiyayaashu hubinayeen iyo waxa kaliya ee la waydiinayay waxa weeye Doorashadu ha dhacdo oo waqtigeedii ha ku dhacdo, si hagaagsan oo caddaaladna ha ku dhacdo. Haddii Doorashada maanta la waayo, haddii Dimuqraadiyadda la waayo, Dunidu way inaga qancaysaa oo wixii aynu rejo lahayn ee aynu umad ahaan ka sugaynay, way lumaysaa oo waxaynu ka mid noqonaynaa Waddamada la magac-baxay inay Dawladnimadoodii luntay.” Ayuu yidhi Guddoomiyaha KULMIYE, waxaanu intaa raaciyay oo uu yidhi,”ILaahay waxaynu ka baryaynaa oo inoo ballan ah, in inaga oo wada-jirkeena ilaalinayna oo iska hor imaadka Dawladdu meel walba ka abuurayso iska ilaalinayna inaynu Doorashadeenaa u diyaar garowno, Insha Allaahu waynu ku guulaysanaynaa.”
Barkhad M. Kaariye Hiiraan Online
barqad@hiiraan.com
Hargeisa, Somaliland.