Ma dhab baa in khilaaf soo kala dhexgalay Saraakiisha Xisbul Islaam iyo Shiikh C/raxmaan Ibraahim Macow?

Arbaco, 28, Oct, 2009 (HOL) Guddoomiyaha Goballka Hiiraan Shiikh C/raxmaan Ibraahim Macow oo kol hore sheegay in uu ku biiray Ururka Xisbul Islaam ee ka mid ah Ururrada ka soo horjeeda Dowladda Soomaaliya ayaa warar hoose oo soo baxaya waxaa sheegayaan in uu mad madow uu soo kala dhaxgalay isaga iyo Saraakiisha Xisbul Islaam ee ku sugan Magaalada Beledweyne.
 
Shiikh C/raxmaan Ibraahim Macow iyo Saraakiishi Xisbul Islaam ee ku sugan Magaalada Beledweyne ayeey wararku sheegayaan in ay isku khilaafeen arrimo la xiriira Maamulka Magaalada Beledweyne, waxaana ay wararku intaa ku sii darayaan in Saraakiisha sar sare ee ku sugan Magaalada ku amreen Guddoomiyaha in uu iska soo wareejiyo gaadiidkiisa dagaalka.
 
Sida Ilo xog-ogaal ah oo ku dhaw dhw Maamulka Goballka u sheegeen HOL waxaa la filayaa in dhawaan Magaalada soo gaaraan Xubno sar sare oo ka tirsan Ururka Xisbul Islaam kuwaas oo lagu wado in ay dhisaan Maamul aan aheyn kii horay uga jiray Magaalada ee uu Guddoomiyaha ka ahaa Shiikh C/raxmaan Ibraahim Macow oo maalintii shalay u amba baxay deegaannka lagu magacaabo Goobo oo ku dhaw degmada Maxaas ee Goballka Hiiraan lamana oga sababta keentay in Guddoomiyaha gaaro deegaannka Goobo oo ay ku sugan yihiin Ciidamo gacan saar la leh Urur diimeedka Ahlu Sunna Waljameeca.
 
C/raxmaan Diini, Hiiraan Online
[email protected]