Qeylo-dhaan lagu dalbayo in la joojiyo dhoofinta Biro yaala Gudaha Dekedda Muqdisho oo isa soo tareysa
Khamiis, October 25, 2007(HOL): Waxaa isa soo taryesa Qeylo-dhaan lagu dalbayo in la joojiyo dhoofinta Biro waa weyn oo yaala gudaha Dekedda weyn ee Muqdisho, kuwaasi oo la sheegay in ay yihiin biro lagu ballaarin lahaa Dekeddaas.
Saakay ayay ahayd markii uu Golaha Dhaqanka iyo Midnimada Beelaha Hawiye, garabka uu hoggaamiyo Maxamed Xasan Xaad uu ka digay in birahaas laga dhoofiyo gudaha Dekedda, iyadoo Afhayeen u hadlay Golahaas oo lagu magacaabo C/llaahi Dheere uu sheegay in Ganacsade la yiraahdo Saciid Daahir uu doonayo inuu birahaas Deked uga sameeyo Deegaanka Garacad oo ka tirsan Deegaanada hoos-taga Maamulka Puntland.
Diniinta Odayaasha
Dhaqanka Beelaha Hawiye
Digniintaas waxaa xigay Banaanbax ay Magaalada Muqdisho ka dhigeen Haweenka Gobolka Banaadir, kuwaasi oo banaanbaxooda uu ku saabsanaa sida ay u rabaan in aan Birahaas la dhoofin, waxayna Madiina Janaraal oo Haweenkaas u hadashay ay sheegtay in aysan qaadan karin in Dekedda kaliya ee dadka raashinka looga soo dejiyo in birihii lagu dayactiri lahaa la rarto.
Digniinta Haweenka
Gobolka Banaadir
Sidoo kalen Odayaasha Dhaqanka Dir Koofureed ayaa maanta shir ka yeeshay Arrinta biraha laga rarayo Dekedda Muqdisho, wuxuuna sheegay Afhayeen u hadlay oo lagu magacaabo Maxamed Geeddi Cilmi in ay tuhmayaan in biro muhiim ah iyo dhagax seddex gees ah oo Dekedda lagu dhisi lahaa la rarayo, wuxuuna caddeeyay in ay aad uga xun yihiin dadka damcay in ay alaabtaas qaataan, kuwaasi oo uu sheegay in ay ka hortegi doonaan.
Digniinta Odayaasha
Dhaqanka Dir Koofureed
Haddaba waxaa la is-weydiin karaa maxaa ka run ah warka ku saabsan in biro Dekedda Muqdisho lagu dhisi lahaa la dhoofinayo, isla markaana loo wado Deegaanka Garacad, arrintaas waxaa ka hadlaya Saciid Siyaad Shirwac oo ka mid ah Howl-wadeennada Dekedda Muqdisho.
Saciid Siyaad Shirwac waxaa uu sheegay in aysan waxba ka jirin in birahaas ay ahaayeen kuwo Dekedda ay lahayd, wuxuuna sheegay in ay birahaas ahaayeen kuwo ay meesha uga tageen Ciidamadii UNOSOM, “Biraha ma ahan kuwo wax taraya, waana kuwo daxaleystay, waxaana la siiyay nin ganacsade ah oo Dowladda lacag deyn ah ku yeeshay, kaasi oo noola yimid Warqad ay u soo saxiixeen madaxda Dowladda”ayuu yiri Saciid Siyaad Shirwac.
Maxay yihiin Biraha laga digayo
in Dekedda laga raro
Si kastaba arrintu ha ahaatee, Markii ay soo baxday qeylo-dhaanta lagu dalbayo in la joojiyo dhoofinta birahaas ayaa waxaa saaka Dekedda Muqdisho tegay Taliyaha Ciidanka Booliska Soomaaliyeed Jen. Cabdi Xasan Cawaale Qeybdiid iyo Saraakiil ka socday Ciidamada AMISOM ee gacanta ku haya Dekedda Muqdisho, kuwaasi oo bixiyay amar ah in la hakiyo dhoofinta Birahaas.
Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia
