Dagaallo culus oo mar kale ka dhacay Deegaanka Baar-Moog ee dhulka Is-maamulka Soomaalida Itoobiya
Arbaco, February 28, 2007(HOL): Wararka ka soo baxaya dhulka ismaamulka soomaalida Itoobiya ayaa sheegaya in dagaal culus uu mar kale ka dhax Qarxay dhinacyadii dhawaan ku dagaalamay deegaanka Baar-Magoog, iyadoo dhanica kalana la sii dayay odayaal dhawaan lagu xiray dagmada Feer-feer si ay nabad u dhax dhigaan dhinacyada is haya.
Gudoomiyaha Maamulka Gobalka Hiiraan Xuseen Mux'med Maalin oo ay HOL la xirirtay isaga oo ku sii jeeda dhulka colaadu ka taagan tahay ayaa sheegay in dagaalku jiro walow aan si Rasmi ah loo ogeyn qasaaraha uu sababay, waxaana uu intaa ku daray gudoomiyuhu in isaga iyo waliba xubnaha la socda ee halka ku wajahan xooga saari doonaan sidii loo soo afjari lahaa colaada si loogu gudbo wada hadal xal lagu gaaro.
Dagaalkan u danbeeyay ee ka dhax qarxay dhinacyadii dhawaantan dagaalamay ayaa marka dhinac laga eego sii kor dhin kara khasaaraha labada garab ka soo gaaray colaada u dhaxeysa iyada oo dagaaladii dhawaantan dhacay ay ku dhinteen in ka badan 30 ruux dhawaacuna intaa ka sii badan yahay.
Dhanka kale waxaa lagu guuleystay in la sii daayo 14 Oday dhaqameed oo dhawaantan ay xirtay dowlada Itoobiya iyaga oo ku sii jeeday deegaanada colaadu ka taagan tahay, waxaaa sii deyntoodu ku soo beegan tay wax yar uun ka dib markii ay degmada Feer-feer gaareen Xubno uu hor kacayo Gudoomiyaha maamulka Gobalka Hiiraan.
Marka la eego colaada ka taagan dhulka Ismaamulka soomaalida Itoobiya oo beelaha ku dagalamaya yihiin kuwo wada dega gudaha gobalka hiiraan, ayaa hada waxaa soo baxaya cabsi weyn oo dadka gobalku ka muujinayaan in dagaalku noqdo mid ku soo fida gudaha gobalka, maadaama aysan jirin cid hada u taagan in arintaasi si foojigan isha ugu heyso, walow dhawaan gudoomiye ku-xegeenka maamulka gobalka Hiiraan Xuseen Cumar Xasan Gacamey uu ka digay in dhinacyada dagalamaya colaadooda ku sii fidiyaan gudaha gobalka.
C/raxmaan Diini, Hiiraan Online
diini@hiiraan.com
Beledweyn, Somalia
