Wararka Maanta:Mar 08, 2006

Wararka Maanta - Arbaco - Mar 08, 2006


·	Baarlamaanka Soomaaliya oo markii ugu horeysay Qodobo uu ka doodayay ku ansixiyay Gudaha Dalka Soomaaliya
·	Maxaa ka soo baxay Shirweynihii seddexaad ee Naadiga Qalinleyda iyo Halabuurka Soomaaliyeed (Somali Speaking Pen) oo dhawaan Jabuuti lagu soo geba?
·	Ciidamada Maamulka Shabeelaha Dhexe oo gacanta ku dhigay lacag been abuur iyo nin waday
	Munaasabadda 8-da Maarso oo si weyn looga xusay meelo ka mid ah dalka Soomaaliya



		Baarlamaanka Soomaaliya oo markii ugu horeysay Qodobo uu ka doodayay ku ansixiyay Gudaha Dalka Soomaaliya Arbaco, March 08, 2006(HOL): Baarlamaanka Federaalka Soomaaliya ayaa isku raacay in guddi hoosaadyo 14 ah loo sameeyo Baarlamaanka Soomaaliyeed, kadib markii ay xildhibaanadii baarlamanka si aqlabiyad ah ugu codeeyeen. Xildhibaanada Baarlamaanka ayaa isku raacayay in guddiyo horay loogu qorsheeyay Baarlamaanka oo ahaa 10 la ballaariyo, isla amrkaana laga dhigo 14 guddi, kuwaasi oo kala qaabilsan Arrimaha Nabadgelyada iyo Difaaca, hub ka dhigista, cadaaladda iyo garsoorka, dib u heshiisiinta, arrimaha bulshada iyo dhowrista bii'ada, dib u dhiska iyo dib u dejinta iyo kuwo kale. Guddoomiyaha Baarlamaanka Soomaaliyeed Shariif Xasan Shiikh Aadan ayaa ku dhawaaqay markii uu kulankii maanta soo xirayay in ay xildhibaanadu isku raaceen in la ballaariyo guddi hoosaadyada baarlamaanka. Dhanka kalena, Kulankii maanta waxaa goob joog ka ahaa, qudbooyinna ka jeediyay wafdi ka socday Dowladda Kenya, kaasi oo ay xubno ka ahaayeen Wasiir ku xigeenka Arrimaha Dibadda Danson Mongateni, Safiirka Dowladda Kenya u qaabilsan Arrimaha Soomaaliya Maxamed Cabdi Afey iyo Shir guddoonkii Shirkii Dib u heshiisiinta Soomaaliyeed ee Kenya lagu soo gebagebeeyay Danjire Bethuel Kiplagat. Wasiirka ku xigeenka Wasaaradda Arrimaha Dibadda oo xildhibaadan hadal u jeediyay ayaa sheegay in uu si weyn ugu faraxsan yahay in maanta uu baarlamaankii Soomaaliyeed oo mid ah uu si dimoqraadi ah u doodayo, wuxuuna tilmaamay in ay taasi si gaar ah u farxad gelineyso Dowladda Kenya oo dalkeeda lagu soo dhisay Baarlamaanka Soomaaliyeed, si gaar ahna wuxuu u ballanqaaday in uu madaxdiisa u gudbin doono waxyaabihii uu Baydhabo kula kulmay iyo sida uu kulansan yahay Baarlamaanka Soomaaliya oo muddo khilaaf ku kala maqnaa. Bethuel Kiplagat ayaa isaguna halkaasi ka hadlay, wuxuuna si weyn ugu dheeraaday ka hadalka taariikhdii shirkii uu guddoomiyaha ka ahaa Mbagathi loogu qabtay Soomaalida, kaasi oo uu tilmaamay in maanta mirahiisii la hayo. Kiplagat waxaa uu xusay in ay farxad weyn u tahay in uu indhahiisa ku arkayo Xildhibaano seddex meelood labo ka badan oo u fadhiya go'aan ka gaarista qodobo hor yaala, wuxuuna carrabka ku dhuftay in intii Kenya la joogay ay shirarka isugu imaan jireen mudanayaal aad u yar. Bethuel A. Kiplagat oo farxad weyn ay ka muuqatay in uu u qudbeynayay Xildhibaanada Soomaaliyeed waxaa uu intaas ku daray in uu codsi u jeedinayo Xogayaha guud ee Qaramada Midoobay Koffi Anan oo uu ka codsaday in uu Baarlamaanka Soomaaliyeed ku booqdo magaalada Baydhabo oo ka ammaan wanaagsan sida uu yiri Gobolka Darfur oo Suudaan ka tirsan, kaasi oo nabadgelyo ahaan ka liita Soomaaliya, gaar ahaan magaalada Baydhabo. Salaad Iidow Xasan (Xiis) Hiiraan Online sxiis@hiiraan.com Baydhabo, Somalia

Maxaa ka soo baxay Shirweynihii seddexaad ee Naadiga Qalinleyda iyo Halabuurka Soomaaliyeed (Somali Speaking Pen) oo dhawaan Jabuuti lagu soo geba?aliya

Arbaco, March 08, 2006(HOL): Shirweynihii Saddexaad ee Naadiga Qalinleyda iyo Halabuurka Soomaaliyeed (Somali Speaking Pen) ayaa ka furmay Aqalka Ummadda ee magaalada Jabuuti 26ki Febraayo 2006da.

Shirweynahani wuxuu ku soo beegmay si weyna u bilay Kulan-wene lagu magacaabay Toddobaadka Afka Hooyo, kaas ku aaddanaa xuska Maalinta Caalamiga ah ee Afka Hooyo, 21/2. Kulan-weynahaas waxaa furay, khudbad dareen hilow dhaqan xanbaarsanna ka jeediyay Madaxweynaha Jamhuuriyadda Jabbuuti Mudane Ismaaciil Cumar Geelle oo aad ugu nuuxnuuxsaday baahida loo qabo daryeelka iyo horumarinta afka hooyo oo uu ku tilmaamay halbowlaha nolosha iyo miftaaxa horumarka ummad kasta. Gabagabadii toddobaadkana madaxweynuhu wuxuu Naadiga PEN guddoosiinyey billad sharafta Dhaqanka, taas oo Naadiga PEN looga abaal-marinayo kaalinta firfircoon ee uu kaga jiro daryeelka afka hooyo, horumarinta suugaanta iyo faafinta aqoonta guud.; maamuuskaas oo aanu madaxweynaha uga celinayno mahad aad u ballaadhan. Isla billad-sharaftaas Dhaqanka wuxuu Madaxweynuhu ku maamuusay abwaanno iyo qorayaal ay ka mid yihiin Maxamed Ibraahim Warsame Hadraawi, Maxamed Daahir Afrax, Aw Jaamac Cumar Ciise, Maxamuud Dirir Geeddi iyo Gamaludin Redo.

Naadiga PEN waxaa sharaf weyn u ah in ay xaggiisa ka timid fikradda qabanqaabinta kulanweynaha Toddobaadka lagu maamuusayo Maalinta Caalamiga ah ee Afka Hooyo, taas oo hindiseheeda lagu qeexay qoraal uu diyaariyey Guddoomiyaha Naadigu. Hirgalinta Toddobaadkana waxaa hormuud ka ahayd Wasaaradda Dhaqanka iyo Warfaafinta Jamhuuriyadda Jabuuti, waxaana gacan ka geystey haya'do iyo shirkado ay ka mid yihiin Djibouti Telecom, Idaacadda iyo Televisionka Jabuuti, Daalo Shirkadda Daalo iyo haya'dda UNESCO; xubnaha PE-na safka hore ayay kaga jireen dadkii u guntaday fulinta barnaamijka.

Shirweynaha Saddexaad ee Naadiga PEN waxaa ka soo qayb galay xubnihiisa Jabuuti ku sugan iyo ergooyin ka kala yimid qaybaha kala duwan ee Soomaaliya, Itoobiya, Sweden, iyo Dalka Ingiriiska.

Waxaa iyana xusid mudan xafladdii lagu maamuusayey gunaanadka shirweynahan inay ka soo qayb galeen Wasiirka Dhaqanka iyo Dalxiiska ee Itoobiya, Mudane Maxamuud Dirir iyo Agaasime Goboleedka 'UNESCO' ee Bariga Afrika, Mudane Awad El-Hassan..

Shirweynaha waxaa hawshiisa la guda galay 26/02/2006, iyadoo lagu bilaabay duco iyo tacsi lagu xasuusanayey xubnihii bahdan 'PEN' iyo suugaanta Soomaaliyeedba qiimaha weyn u lahaa ee dhawaan ka geeriyooday oo ay ka mid ahaayeen Cabdulqaadir Xirsi Yamyam, Ibrahim Suleymaan Gadhle, Ilyaas Xasan, Maka Shirdoon iyo Aden Nuur Maxamed.

Intaa ka dib waxaa la soo bandhigay lana ansixiyey Ajeendaha Shirweynaha, kaas oo ka koobnaa qodobbada hoos ku taxan :

1. Furitaan & Daqiiqad la xasuusto xubno geeriyooday: Yamyam, Ibrahim Gadhle iyo Adan Nuur
2. Ansixin ajendaha
3. Erayga Odayada Naadiga - Hadraawi
4. War-murtiyeedkii Shirweynihii hore - Riiraash
5. Warbixinta Guddoomiyaha
6. Warbixinaha Laamaha:
a) Laanta Djibouti
b) " K/Soomaaliya
c) " Sweden
d) " UK
6. Su'aalo iyo ka-faallootan warbixinihii la dhegeystay,
7. Warbixinta khasnajiga,
6. Dib-u-qiimayn dhismaha Laamaha, Guddiyada iyo hab-socodka hawlaha
Naadiga,
7. Qiimayn fulinta qorshe-hawleedkii hore,
8. Amba-qaadka Qorshaha 2da sanee soo socota,
9. Go'aannada shirweynaha,
10. War-murtiyeed,
11. Doorashada Odayada Naadiga,
12. Doorashada Guddiga Fulinta

Furitaanka Shirweynaha waxa ereygii ugu horreeyay halkaa ka soo jeediyay abwaanka caanka ah ee Maxamed Ibraahim Warsame Hadraawi oo ku hadlayey magaca Odayada Naadiga.

Waxaa ku xigey Maxamed Cabdillaahi Riiraash oo shirweynaha u akhriyey murtida hadal-qoraalkii Shirweynihii labaad ee Naadiga laguna qabtay Jabuuti bishii Juun, 2003, si dib loogu xasuusto himilooyinkii waqtigaas, loona qiimeeyo wixii ka qabsoomay iyo qabsoomi kari waayey.

Waxaa dabadeed hadalka qaatay Guddomiyaha Naadiga, Maxamed Daahir Afrax oo Warbixin guud oo dheer halkaa ka soo jeediyay, taas oo uu sawir cad ka bixiyey marxaladihii kala duwanaa ee ay uu soo maray hawqabadka naadigu muddadii u dhaxeysey labada shirweyne iyo baahida loo qabo cusboonaysiinta iyo sii hrumarinta hawlgalka PEN. Waxaa ku soo xigay warbixino ay soo jeediyeen ergooyinkii ka kala socdey socday laamaha Naadiga ee Jabbuuti, Koonfurta Soomaaliya, Sweden, iyo UK, kuwaas oo ay uga hadlayeen guud ahaan wixii soo qaybteen ilaa dhismohoodii iyo talooyinka ay soo jeedinayaan xubnaha Laamahaas ee ku kala baahsan dalalka kala duwan.

Maalinta galinkeedii dambe waxaa si aad u qota dheer looga dooday hab-socodka hawl-qabadka Naadiga iyo tallaabooyinka loo baahan yahay in hore loo qaado, si loo dardar-galiyo, wixii dibuhabayn loo baahan yahayna loogu sameeyo hawlqabadka Naadiga.

Dabeed waxaa la galay qaybihii ugu dambeeyey ajeendaha Shirweynaha, kuwaas oo ah doorashada Odayada Naadiga iyo Guddiga Fulinta iyo warmurtiyeedkii gunaanadka Shirweynaha.

Odayada Naadiga waxaa la gartay in saddexdii hore lagu biiriyo laba oday oo cusub, kuwaas oo kala ah Xaashi cabdillaahi Orrax iyo Maxamuud Dirir Geeddi. Sidaa awgeed Odayada Naadiga ee kalkan waxay noqonayaan :

Nuruddin Farah
Maxamed Ibraahim Hadraawi
Ismaaciil Xuseen Taani
Xaashi Cabdillaahi Orrax
Maxamuud Dirir Geeddi

Xagga Guddiga Fulinta waxaa guddoomiye-ku-xigeen cusub loo doortay Cumar Aadan Qaaddi oo hore u ahaa Xoghayaha Naadiga. Magacyada iyo xilalka Guddiga Fulinta ee cusub waa sida hoos ku qoran :

Maxamed Daahir Afrax - Guddoomiye
Siciid Jaamac Xuseen - Guddoomiye-ku-xigeen
Cumar Adan Qaaddi - Guddoomiye-ku-xigeen
Aadan Xasan Aadan - Xoghaye
Maxamed Siyaad Ducaale
Said Daud - Khasnaji
Cabdi Caateeye - Masuulka Warbaahinta & Isgaarsiinta
Maxamed Cabdillaahi Riiraash - Masuulka Hawlgallada iyo Abaabulka
Cabdisalam M. Ciisa-Salwe - Masuulka Qorayaasha Qurbaha & Barta Internetka
Idiris Yuusuf Cilmi - Masuulka Horumarinta Luqadaha
Cumar Siciid Bile - Masuulka Ilaalinta Xuquuqda Qalinleyda iyo Halabuurka
Maryan Cariif Qaasim - Masuulka Arrimaha Qorayaasha & Halabuurka Dhaddig
Sagal cabdulqaadi - Masuulka Arrimaha Xubnaha & xubinimada
Muumin Xuseen cabdi - Masuulka Tarjumadaha iyo Dhaqan-wadaagga
Burhaan Axmed Daahir - Tifaftiraha Warsidaha Naadiga
Ismaaciil cabdi Axmed - Kuxigeenka Ilaalinta Xuquuqda Qalinleyda & Halabuurka

Gunaanadkii Shirweynaha waxaa la isla eegay, lana ansixiyey war-murtiyeedkii shirweynaha, waxaanna halka ku soo koobaynnaa murtidii go'aannada:

" In la kordhiyo tirada Odayada.

" In Guddida Fulinta awood loo siiyo Dajinta Qorshe-hawleedka xilliga soo socda iyo wixii dibuhabayn u baahan hab-socodka hawlqabadka.

" In meesha laga saaro guddiyadii lagu dhisay shirweynihii hore, maa daama ay shaqayn waayeen.

" In si weyn loo xoojiyo xiriirka qaybaha iyo xubnaha ku kala sugan adduunyada daafaheeda, iyadoo la aqoonsaday in horuumarka iyo shaqo wanaagga Somali PEN ay raad weyn ku yeelaneyso hadba sida wanaagsan ee loo sahlo isku-xirkaa.

" In xoogga la saaro sidii Somali PEN ay u heli lahayd dhaqaale ay barrnaamijyadeeda ku hawl-geliso, iyadoo tixgelin gaar ah la siinayo sidii dhaqaalahaa qaybtiisa badan looga heli lahaa shakhsiyaadka, shirkadaha iyo ganacsatada Soomaaliyeed.

" In qorshe hawleedka labada sanno ee soo socda xoogga la saaro sii wadidda iyo sii xoojinta barnaamijka socda ee hal-ku-dheggiisu yahay 'Hirgelinta Hal-Abuurka ku Qoran Afka Hooyo', taasoo lagu fidinayo dugsiyada iyo xarumaha kale ee waxbarashada, lalana kaashanayo qalabka warbaahinta

" In xoog la saaro faafinta buugaagta ku qoran afka hooyo iyadoo la gaarsiinayo dadka u baahan, dugsiyada iyo deegaannada oo dhan

" In lagu guubaabiyo, laguna wacyi geliyo bahda ganacsatada Soomaaliyeed in ay maalgelin ku sameeyaan daabacaadda iyo suuq-gelinta buugaagta Af- Soomaaliga ku qoran
" Naadigu wuxuu xoojin doontaa difaaca iyo ilaalinta madax-bannaanida fekerka iyo xuquqda qoraaga, suxufiga iyo halabuurka.

Ka qayb galayaasha Shirweynaha 3aad ee 'Somali PEN' waxay mahad ballaadhan u celiyeen guud ahaan dawladda iyo ummadda reer Jabuuti, gaar ahaanna Madaxweynaha dalka, Mudane Ismaaciil Cumar Geelle, iyagoo uga mahad celiyey marti-gelinta, deeqsinimada iyo garab galka hagar la'aaneed ee ay mar walba nala garab joogaan.

SOMALI-SPEAKING CENTRE
OF THE INTERNATIONAL P.E.N.
A WORLD ASSOCIATION OF WRITERS
United Kingdom: P.O. Box 43446 London SE11 4YW, United Kingdom, Djibouti Office: P.O. Box 3366 Djibouti, Djibouti, Tel/Fax +253 35 2926, email: webmaster@somalipen.org, somalipen@hotmail.com



		Ciidamada Maamulka Shabeelaha Dhexe oo gacanta ku dhigay lacag been abuur iyo nin waday Arbaco, March 08, 2006(HOL): Ciidamada nabadgelyada Maamulka Gobolka Shabeelaha Dhexe ayaa xalay waxay gacanta ku dhigeen lacag shillin Soomaali ah oo been abuur ah iyo ninkii watay oo lagu magacaabo C/llaahi Maxamed Cali, kaasi oo haatan ku xiran saldhigga Booliska Magaalada Jowhar. Guddoomiyaha Guddiga Siyaasadda Gobolka Shabeelaha Dhexe Maxamed Cumar Xabeeb (Maxamed Dheere) ayaa qabashada ninkan shaaca ka qaaday, wuxuuna caddeeyay in ninkaas lala qabtay lacag dhan 48,900,000 Sh. So ah oo lacag been abuur ahayd, wuxuuna carrabka ku dhuftay in sharciga la horgeyn doono. Howlgalka ay ciidamada Maxamed Dheere ku qabteen ninkaas ayaa wuxuu ku soo beegmayaa iyadoo maalmihii tegay ay soo baxayeen warar sheegayay in Maamulka Maxamed Dheere uu ganacsatada Magaalada Jowhar si qasab ah ku ogoleysiinayo lacag aan tayo ahaan wanaagsaneyn oo la soo been abuuray, hayeeshee warkaasi wuxuu u muuqdaa mid aan jirin bacdamaa uu maamulkaas jeelka dhigay nin lacagtaas lagu qabtay. Lacagtan ayaa la sheegay in ay markii horeba magaalada Jowhar geliyeen Ciidamo ku xareysnaa Xerada Congo oo mushaar ahaan loo qeybiyay, kuwaasi oo ka soo jeeda Gobollada Puntland iyo Gobolka Hiiraan. Dhanka kalena, Wararka naga soo gaaraya magaalada Jowhar ee gobolka Shabeelaha Dhexe ayaa sheegaya in qaar ka mid ah ciidamadii ku xareysnaa xerada Congo ay u kala amba baxeen gobollada Bay, Bakool iyo Hiiraan, wuxuuna bixitaankooda ku soo beegmay iyadoo dhawaan Maxamed Dheere oo ka taliya halka ay xeradooda ku taalo uu shir jaraa'id ka sheegay in Ciidamadaas aaney ahayn ciidamo Qaran balse ay yihiin ciidamo Qabiil. Salaad Iidow Xasan (Xiis), Hiiraan Online sxiis@hiiraan.com Baydhabo, Somali



		Munaasabadda 8-da Maarso oo si weyn looga xusay meelo ka mid ah dalka Soomaaliya Arbaco, March 08, 2006(HOL): Munaasabadaan lagu xusayeyMaalinta Sideeda Marso ee haween weynaha Aduunka qaas ahaan haweenka soomaaliyeed oo ay soo qabanqaabiyeen hay'adaha INXA iyo Xarunta Dr. Ismaaciil Jimcaale ee Xuquuqda Aadanaha ayaa maanta lagu qabtay magaalada Muqdisho. Xafladdii lagu xusayay maalintan oo ka dhacday Xarunta Xuquuqda Aadanaha ee Dr. Ismaaciil Jimcaale ayaa waxaa ka qeybgalay mas'uuliyiin ka socotay Ururada Bulshada Rayidka, gaar ahaan kuwa haweenka, Guddoomiyayaasha Degmooyinka Gobolka Banaadir iyo xubno kale. Guddoonka Xarunta Dr. Ismaaciil Jimcaale Marwo Maryan Xuseen Maxamed Awreeye oo qudbad ka jeediyay munaasabaddaas ayaa ku dheeraatay ka hadalka maalinta Haweenka Adduunka, "Xuska munaasabaddan qaaliga ah ee 8-da Maarso waxay ku soo beegantay iyado dalku marayo marxalad kala guur ah, waxaase wax lagu farxo ah in in labadii gole ee Dowladda Federaalka ay ku shirayaan magaalada Baydhabo kadib markii la xaliyay khilaafkii ka dhaxeeyay madaxda sare ee dowladda oo muddo dheer soo jiitamayay"ayay tiri Marwo Maryan Xuseen Awreeye. Maryan Awreeye waxay sheegtay in ay INXA iyo Xarunta Dr. Ismaaciil Jimcaale ay si weyn ugu faraxsan yihiin in Munaasabadda 8-da Maarso ay Haweenka Soomaaliyeed ku soo bandhigaan dareenkooda, iyagoo adeegsanaya Khudbado, Heeso, Baraanburro iyo ciyaaraha Hidaha iyo Dhaqanka oo ku aadan caqabadaha ay la kulmaan iyo horumarka ay gaareen intii lagu jiray xaaladaha adag ee uu dalku marayo. "Sidaas aawgeed haween badan ayaa la dilay la dhaawacay, lana bara-kiciyay, waxaana lagu xad-gudbay xuquuqdoodii qofnimo,waxaa xaqiiq jirto ah in haweenka loo geysto jirdil, fara-xumeyn iyo in laga hor-joogsado ka qeybgalka siyaasadda iyo howlaha kale ee bulshada intooda badan"ayay mar kale tiri Maryan Awreeye. Ugu dambeyntiina labada urur ee xafladdan soo qaban qaabiyay ayaa waxay soo saareen qodobo talo soo jeedin ahaa, kuwaasi oo ay ka mid yihiin: 1- in si wada jir ah looga hor-tago dhamaan xadgudubyada loo geysto haweenka Soomaaliyeed. 2- In dhamaan ururada Bulshada rayidka ay iska kaashadaan, una ololeeyaan difaacidda Xuquuqda Haweenka, horumarintooda iyo ku wacyigelinta bulshada xuquuqda Haweenka ay leeyihiin. 3- In loo howlgalo sidii looga gudbi lahaa dhamaan marxaladaha iyo caqabadaha horseeda in dib u dhac ku yimaado howlaha lagu horumarinayo haweenka Soomaaliyeed, gaar ahaan xadgudubyada gudniinka Fircooniga ah. Sidoo kalena, Maalinta Haweenka Aduunka oo ku beegan 8 Maarso, ayaa Xaflad lagu maamuusayay oo ay soo qaban qaabiyeen Gabdhaha " Ururka la magacbaxay Israac" Laguna qabtay Magaalada B/weyn,ayaa marka laga soo tago Xuska maalintaa ku weyn Haweenka Aduunka guud ahaan, waxaa ay kaga hadleen dhinacyadii ka soo qeyb - galay arimo dhowr ah oo laxiriira sida, Abaaraha, Muhiimada Waxbarashada Gabdhaha, iyo waliba socdaalo ay ku soomareen qaar ka mid ah Xubnaha sar sare ee Ururka Xeryaha Qaxootiga Dalka kenya Gudoomiyaha Ururka Israac ee Gobalka hiiraan Marwo, Maryan Tahliin oo u warantay (HOL) ayaa sheegatay si loo hormarayo Aqoonta Gabdhaha ruruku xooga saaray sidii uu deeq waxbarasho u siin lahaa Haweeyn Badan oo ku dhaqan Gobalka hiiraan, kadib markii sida ya sheegtay uu ururku arkey in aqoonyarida heysata in badan oo ka mid ah Gabdhaha ay sababtay in Qaarkoo ay isaga tagaan Ganacsigii ay hayeen kadib markii ayeey tiri ay kala saari waayeen "Qasaare iyo faa'iido waxa ay ku jiraan' sidoo kale waxaa ya soo hadal qaaday Gudoomiyaha ruruka, xaalada Abaarta ee ka jirta Gobalka iyadoo Tilmaamtay in hadda ay ku howlan yihiin sidii ay Gudiga ka hortaga abaaraha Gobalka ay u gudoonsiin lahaayeen Deeqo ay ugu tala galeen dadka Abaartu saameysay. Marwo, Maryan Tahaliin dhanka kale waxaa ay ka warbixisay Socdaal dhawaan ay ku tageen iyada iyo mas'uuliyiin qaar ka mid ah Ururada Haweenka ee ka jira Gobalada qaar dalka kenya, iyadoo sheegtay in socdaalkaasi uu ahaa mid la xiriira sidii hey'adaha caalimiga ay uga dhaadhic lahaayeen sidii gacan loo siin lahaa Haweeynka soomaaliyeed, Gaar ahaan waxaa ay carabka ku dhufatay in safarkoodaaa ay isku soo arkeen Mas'uuliyiinta, sida Hay'adaha "UNDP"" KOSOVO" iyo wakiilka Dowlada Talyaaniga ee arimaha soomaalida, waxaa sidoo kale aan meesha ka marneyn sida ay sheegtay in ay xooga saarayeen sidii xayiraada looga qaadi lahaa Baasboorka soomaaliga oo dhawaan ay mamnuucday dowlada Kenya. Munaasabada xuska 8 mar, oo kamid ah munaasabadaha caalamiga ah ayaa dhinacyadii ka soo qeyb-galay waxaa ay intooda badan xooga saareen in laga wadda qeyb qaato sara u qaadita hormarka haweenka, iyadoo aan meesha laga saarin in la raaco sidii uu Alle raali ka yahay Haweeynka ayaa intii ay munaasabadu soctay waxaa ay socod ku soo mareen guud ahaanba xaafadaha Magaalada, iyagoo sita halku dhagyo ay ku baraarujinayaan Haweenka Gobalka Hiiraan. Munaasabada ayaa dhinacyadii ka soo qeyb-galay waxaa ka mid ahaa mas'uuliyiinta hey'adaha Gobalka, iyo qaar ka mid ah mas'uuliinta heer Gobal iyo degmo ee Gobalka hiiraan C/raxmaan diini, Hiiraan Online diini@hiiraan.com Beledweyn, Somalia

Ciidamada Maamulka Shabeelaha Dhexe oo gacanta ku dhigay lacag been abuur iyo nin waday

Munaasabadda 8-da Maarso oo si weyn looga xusay meelo ka mid ah dalka Soomaaliya