Hoggaamiye Kooxeed ka tirsan Isbaheysiga La-dagaalanka Argagixisada oo sheegay in aanu dhamaanin dagaalkii Muqdisho

Isniin, June 12, 2006 (HOL): Mid ka mid ah Hoggaamiye Kooxeedyada Soomaaliyeed ee inta badan lagala wareegay gacan ku heynta Magaalada Muqdisho ayaa Axaddii shaaca ka qaaday in in uusan weli dhamaanin dagaalkii Muqdisho ee dhexmaray Midowga Maxkamadaha Islaamka iyo Isbaheysiga La-dagaalanka Argagixisada.

Hadalka ka soo yeeray Hoggaamiye kooxeedkan oo aan isagu weli Muqdisho ka tegin ayaa wuxuu ku soo beegmayaa maalin kadb markii Dagaalyahannada Islaamiyiinta ah ee Muqdisho qabsaday ay xayiraad ku soo rogeen xaafado ay awood badan ku leeyihiin, kuwaasi oo loo diiday in laga daawado Ciyaaraha Koobka Adduunka, iyadoo taasina lagu tilmaamay calaamooyin asal raacnimo ah oo ay la soo baxayaan Xoogagga Maxkamadaha ee qabsaday Magaalada Muqdisho.

Muuse Suudi Yalaxow oo ah Hoggaamiyahaas ayaa Wakaaladda Wararka AP u sheegay in kooxdiisa Isbaheysiga La-dagaalanka Argagixisada ay dib isu abaabuleyso, si ay ula dagaalanto Maleeshiyooyinka Maxkamadaha oo uu ku eedeeyay in ay xiriir la leeyihiin Al-Qaacidda. Saraakiil Mareykan ah ayaa horay u sheegay in ay taageero siiyeen Hoggaamiye Kooxeedyada ku bahoobay Isbaheysigii La-dagaalanka Argagixisada, si ay ula dagaalamaan Hoggaamiyayaal Islaamiyiin ah oo Muqdisho ku magangelinaya seddex nin oo ka tirsan Ururka Al-Qaacidda, kuwaasi oo loo heysto in ay ka dambeeyeen qaraxyadii loo geystay Saafaradihii Mareykanka uu ku lahaa dalalka Kenya iyo Tanzania sanadkii 1998-kii.

“Isbaheysiga wuxuu sii wadi doonaa dagaalka ilaa aan ku guuleysanno dagaalka aan kula jirno Argagixisada”ayuu yiri Muuse Suudi oo sheegay in aaney ciidamadiisa is-dhiibi doonin.

Dhanka kalena labo ruux ayaa dhaawacantay kadib markii ay maleeshiyooyin ka amar qaata Midowga maxkamadaha Islaamka ay weerar ku qaadeen goob Shineemo ah oo lagu daawanayay ciyaaraha Adduunka, waxaana falkaas ay sameeyeen Maleeshiyooyinka Maxkamadaha difaacay Guddoomiye ku xigeenka Midowga Maxkamadaha Islaamka Shiikh C/qaadir Cali Cumar oo sheegay in ay howlgalkoodaas kaga hortegayeen in la marin habaabiyo Caruurta Muslimka.

Laakin dadka Muqdisho ayaa qaarkood waxay la yaaban yihiin go'aannada ka soo baxaya Midowga Maxkamadaha kadib markii ay Magaalada inteeda badan qabsadeen, “Isla marka ay guuleystaan Midowga Maxkamadaha Islaamka, waxaan fileynay in aan xornimo heli doonno”sidaasi waxaa yiri Aadan Xaashi Cali oo ah Wiil Dhalinyaro ah oo Muqdisho ku nool, “Laakin hadda waxayba naga hor joogsadeen in aan daawanno Ciyaaraha Adduunka”ayuuna hadalkiisa ku sii daray.

Hayeeshee Midowga Maxkamadaha Islaamka oo ka kooban Maxkamado Beeleedyo la isu geeyay ayaa Guddoomiyahooda Shiikh Shariif Shiikh Axmed waxaa uu beeniyay in ay doonayaan in ay dalka Soomaaliya ku soo rogaan Xukun Dowladeed la mid ah midkii Daalibaan, wuxuuna ku gaabsaday in ay aqbalayaan aragtida dadka Soomaaliyeed ee la taliya. Shiikh Shariif waxaa kale oo uu beeniyay in ay jiraan dad ku jira Ururkiisa oo Xiriir la leh Al-Qaacidda, wuxuuna sheegay in uu wararkaasi oo aan jirin ka faafiyay Mareykanka.

Ugu dambeyntiina, Hoggaamiyayaasha Midowga Maxkamadaha Islaamka iyo Mas'uuliyiinta Dowladda Federaalka Soomaaliyeed ayaa soo dhaweeyay wada hadallo ay yeeshaan, walow la xusuusan yahay in ay labada dhinac horay isu eedeyn jireen ka hor guushii Muqdisho ee Maxkamadaha, waxayna taasi calaamatu Su'aal saareysaa natiijada ka soo bixi doonta wada hadallo ay yeeshaan labada dhinac.

Salaad Iidow Xasan (Xiis) Hiiraan Online
sxiis@hiiraan.com
Mogadishu, Somalia

Ururada Bulshada Rayidka ah iyo Guddiga Gurmadka Abaaraha oo ka arinsanaayo waxa laga yeelayo Dad soo barakacay oo ku sugan Magaalada Kismaayo

Isniin, June 12, 2006 (HOL): Kulan ay isugu yimaadeen Ururada Bulshada Rayidka ee magaalada Kismaayo iyo Guddiga Gurmada Abaaraha ayaa waxay kaga wada hadlayeen sidii ay u taageeri lahaayeen boqolaal qoys oo ka soo barakacay deegaanadoodii kuwaasoo ku sugan magaalada Kismaayo

Xubnihii Kulankaas isugu yimid ayaa waxay wada gorfeyeen sidii ay u qaadi lahaayeen tilaabooyin deg deg ah oo ay ugu tabarucayaan dadkaasi ku dhibaataysan guryo iyo xeryo qaxooti oo magaalada ah oo ay dulsaar ku yihiin.

Ururadii bulshada ee la kulmay Guddiga Gurmada ayaa gaaray qodobo ay ka mid ahaayeen sidii u amba qaadi lahaayeen waxqabad deg deg ah, iyadoo ay sheegeen in ay isugu yeeraan maanta Gudiga maamulka degmada Kismaayo ee 21ka xubnood ah, si ay ugu soo bandhigaan dhibaatadaan heysato dadkan.

Dadkani haatan ay timid cabashadooda ayaa ah kuwii ka soo barakacay dagaalladii ka dhacaayey magaalada Muqdisho oo u badan qoysas danyar ah oo aan helin wax gargaar ah,waxayse cabshadoodu imaanaysaa xili magaalada Kismaayo uu ku soo xirtay Markab sido mucaawino ay hay'adda  WFP ugu talagashay in la siiyo dadka ku wax yeeloobay Abaaraha, Fatahaada iyo Colaadaha.

Dhanka kalena markab u raran hay'adda Cuntada aduunka ee WFP ayaa ku soo xirtay Marsada Caalamiga ah ee magalaada Kismaayo , wuxuuna qeyb ka yahay barnaamijkii cuno bixinta ee ay ka waday waayadaani WFP Jubboyinka.

Markabkani waxaa saaran raashin isugu jira Galley, Saliid, Misir iyo Qamadi loogu talagay in la gaarisiiyo deegaanada hoos yimaado Gobollada Jubbooyinka, gaar ahaana Jubbada Hoose , Jubbada Dhexe , iyo Gedo.

Waxaa raasinkaasi oo dajintiisa ay bilaabatay ayaa waxaa uu sidaa ku dhowaad saddex kun iyo shan boqol oo mitir tan, waxaana loogu talagalay in si siman looga bixiyo dhamaan deegaanada ay degen yihiin dadkii ku waxyeeloobay abaarihii kal hore iyo fatahaadahii Webiga Jubba ee bilihii aynu soo dhaafnay.

Raashinkan ayaa wuxuu qeyb ka yahay kii ay hore u keentay WFP labadii wareeg ee hore magaalada Kismaayo, kaasoo inta badana lagu guulaystay bixintiisii, inkastoo meelaha qaarkood ay ka horyimaadeen caqabado fara badan .

Sidoo kale keenista Raashinkan iyo bixintiisa ayaa waxay ku soo beegmeysaa xilli gobollada Jubbooyinka iyo deegaano hoos yimaado ay ka jiraan dhibaatooyin cunno la,aaneed oo ka dhasahay kadib markii ay ka soo barakaceen dadkii degenaa dhul beereedyada deegaanadoodii iyo kuwo kale oo ku waxyeeloobay xiligii abaaraha, iyadoo qaarkoodna ay ka baaba'een xoolihii ay lahaayeen.